英格蘭上場友賽僅能以1:1賽和烏拉圭，翼鋒馬度基（Noni Madueke）、攻中科頓（Phil Foden）更喺比賽中傷出，為杜曹臨場部署再添難度。杜曹今次本來想兵分兩路，分A、B team輪流出戰烏拉圭與及日本，點知踢完頭場之後阿仙奴就已經通知多名帶傷嘅英格蘭球員即刻離營。除咗對烏拉圭有落場嘅馬度基外，原本預備壓軸先至出戰日本嘅迪勤懷斯（Declan Rice）同布卡約沙卡（Bukayo Saka）亦係直接收工，杜曹今次真係大失預算。

杜曹本想借兩場友賽試真副選鋒線，尤其想搵一個穩陣可靠嘅二號中鋒去支援哈利卡尼（Harry Kane），但實情係爭到正選上陣嘅蘇蘭基（Dominic Solanke）以至後備落場嘅卡維特利雲（Dominic Calvert-Lewin）對烏拉圭一役都係表現平平，把握力不足。杜曹呢個俾國內傳媒評為「臃腫」嘅35人大軍實驗秒變成紙上談兵，暫時嘅新收獲，計落就只得首次落場嘅愛華頓防中加拿（James Garner）。

日本方面，今期作客歐洲，首場對住世界排名40嘅蘇格蘭，陣容都有所保留。主將右翼久保建英（皇家蘇斯達）受傷休戰，防中遠藤航（利物浦）更已係傷出多時，結果由「地膽」些路迪中場前田大然以隊長身份領銜上陣，配合多名喺德國搵食嘅球員例如伊藤洋輝（拜仁慕尼黑）、田中碧（德素多夫）等球員應戰。不過較出人意表係正選中鋒起用咗聖圖爾登嘅後藤啟介，下半場先再調入正選資歷豐富嘅上田綺世（飛燕諾）加強攻力，臨尾由33歲老將伊東純也（亨克）上場後一劍封喉，始終薑係老嘅辣。

日本同英格蘭一樣，今期友賽留咗唔少餘力準備壓軸先嚟真打，好似三笘薰（白禮頓）、今期正印隊長堂安律（法蘭克福，圖右）上一仗都係以後備身份上陣，今場好大機會係同步擔正，加強左右翼直接對撼英格蘭防線。到時杜曹就可以評估表現復蘇嘅曼聯中堅麥佳亞（Harry Maguire，圖左）係唔係足以信賴。