一隊係世界盃第四名，另一隊則係連續錯失兩屆世界盃決賽週：法國同意大利仍能夠繼上屆歐國聯之後再次編入同一組。前年雙方各自喺對方主場贏3:1已夠奇情，而今屆意大利首仗出師不利之後迅速調整作客大勝土耳其，贏番士氣之餘亦令今場作客巴黎法蘭西體育場多番啲睇頭。

意大利喺世界盃歐洲區外圍賽未能直接出線，附加賽最後一關去到互射十二碼又輸埋俾波斯尼亞，再一次錯過世界盃，意大利足總壓力有幾大係可想而知，而喺一輪擾攘過後佢哋終於「翻撻」文仙尼。要知道文仙尼就係帶領意大利2021年贏完歐國盃冠軍轉頭就喺世界盃外圍賽出局嘅教練，如今文仙尼回歸，首戰打歐國聯就喺主場以0:2輸咗俾比利時，擁躉自然係滴晒汗。但文仙尼總算有名帥嘅膽量，去到第二場作客土耳其一口氣喺八個正選位置上作出改動，結果換番一場嘅4:1大勝穩住軍心。

贏土耳其呢場除咗係有中堅巴斯東尼（Alessandro Bastoni）坐完波監復出，左右兩路大量起用新人亦都帶嚟咗新氣象，其中22歲嘅賓福特右閘基約迪（Michael Kayode）首次落場就取得入球，佢喺右路突破同傳中都帶嚟唔少威脅，再有國際米蘭21歲仔中鋒比奧艾斯保薛圖（Pio Esposito）取得11場國際賽以嚟嘅第六個入球，文仙尼梗係安心晒啦，後段亦都改踢較保守嘅4-5-1保住領前優勢直至完場。

呢場波過後未必代表左右兩路立即改朝換代，但起碼係暫時派到粒定心丸：就係文仙尼應可以用番以前喺意大利用開嘅4-3-3陣式，喺由門將當拿隆馬（Gianluigi Donnarumma）、中堅巴斯東尼、中場東拿利（Sandro Tonali）以至新晉前鋒奧艾斯保薛圖構成嘅中軸線上再做修訂。前鋒拉斯柏度尼對土耳其期間傷出，依家已經直情離開埋集訓營，但陣中可用人選同活力都有番咁上下，對文仙尼嚟緊兩場分組賽嘅佈局應唔會有太大影響。

主隊法國嘅焦點就當然落咗喺新上任嘅一代球王施丹身上。施丹上任後頭兩場歐國聯全部贏波，先係作客1:0贏土耳其，然後直落作客同樣以1:0嘅比數贏埋比利時，六分到手喺A1組領先。場上嘅球霸前鋒麥巴比喺首場對土耳其時整親膝頭，同拉斯柏度尼一樣都已經離營，但法國左翼位置仍有一位巴高拿（Bradley Barcola），暫時未對引入4-3-3陣式嘅施丹構成太多障礙。第二場對比利時更好似文仙尼咁進行正選大兜亂，換咗足足九個人，呢半隊正選之中更係有達根夏（Lucas Da Cunha，科木中場）、查基（Jeremy Jacquet，利物浦後衛）等五位cap帽數量未過三嘅新丁，實行用疑兵之計消耗對手比利時，去到70分鐘左右先放迪比利（Ousmane Dembele）、奧利斯（Michael Olise）、卓基（Rayan Cherki）落場屈機收割三分。

單計球員個人實力，施丹照計夠guts面對重建中嘅意大利重施故技，但始終今場係主場要向擁躉交差唔可以玩咁盡，加上上屆所見意大利呢位老對手就算有幾甩漏都仍有作客贏波嘅能耐，而且意大利近況已見回穩，施丹嘅調兵遣將照計應會變番較為正路實行穩陣行先。

（UEFA.tv直播連結：https://www.uefa.tv/live/314743）