2026年世界盃「發水」新開出嚟嘅「三十二強」階段，正好為兩大歐洲傳統足球強國荷蘭同埋德國提供咗遮醜布。如今兩隊齊齊換教練重新上路，又齊齊編入歐國聯A2組，正好睇下兩位新教練高普、沙維喺用人以至打法上有冇為兩隊提供到一啲新嘅方向。

荷蘭喺世界盃期間係有啲唔好彩，朗奴高文帶領嘅荷蘭隊本來就已經欠缺咗具份量嘅中鋒，但更慘係名單公佈後可以勝任多個位置嘅攻中沙維西蒙斯先至重傷退隊，兼再失去尤利安添巴與及迪歷特兩位後防傷兵，一出到三十二強就俾摩洛哥淘汰出局。如今荷蘭相隔近五十年後再度聘請外國教練帶隊，喺巴塞隆拿教過三年半嘅西班牙名宿沙維上任之後，睇個勢都唔會用番朗奴高文喺世界盃期間重啟嘅三後衛打法，而係會有更多短傳、控球元素，期望用中場細膩組織彌補昔日嘅漏洞。

但講就簡單，實際操作起嚟仍需要實戰印證。撞正荷蘭今期沙維西蒙斯仍未復出、另一位技術型中場迪莊亦都因傷未有入選。話唔定沙維會參考埋剛贏得世界盃嘅祖國西班牙，引入增加咗垂直推進元素嘅進化版「Vertical Tiki-Taka」，如果真係循呢個方向發展，參照番荷蘭今期嘅中場人選，兩個肯跑兼有突破能力嘅雷恩達斯（Tijjani Reijnders，今季從曼城轉投艾卡迪沙），以至格雲貝治（Ryan Gravenberch，利物浦）都有機會成為焦點，而呢種打法亦都好大機會幫助到加普（Cody Gakpo，利物浦）呢類傳統翼鋒，又如果新特蘭24歲中鋒布羅比（Brian Brobbey）接到棒擔到大旗，馬倫（Donyell Malen，羅馬）就可以安心踢番右翼位置，亦都唔再需要太過期望今期落選嘅迪比。後防方面，外界一度猜測同屬利物浦嘅35歲中堅隊長雲迪積克（Virgil van Dijk）會唔會喺呢一波人事大變動之中乘勢退出，但沙維今次都有選上佢，睇嚟都會以擺番好中前場為首要任務。

至於客隊德國今期亦都獲得係好關注。據講拿高士文同德國續約時，條款講咗德國如果喺世界盃實現近三屆以嚟首次躋身淘汰賽階段，足總想炒拿高士文係需要賠足錢。最終結果大家都見到：冇錯，德國自2018、2022以嚟首次闖過小組賽，但呢屆世界盃淘汰賽首圈係三十二強唔係以往嘅十六強，而呢隊從組軍以至執行都睇到眼凸嘅德國亦都剛好喺三十二強就即刻俾巴拉圭淘汰，同荷蘭一樣係互射十二碼不敵對手出局，所以最初民怨沸騰嗰陣，拿高士文仍然係未sense到自己需要問責下台。德國人等咗十年有多嘅答案高普終於浮出水面，佢喺多蒙特、利物浦年代儲落嘅fans自然好想睇到高普點樣將gegenpressing呢啲重金屬踢法注入呢隊暮氣沉沉嘅德國隊之中。但理性啲去諗，事情應該唔會咁簡單直接。

先講番今次德國呢份44人嘅超長名單。放心，高普唔係傻到要同時帶住44人去試，實情係今屆歐國聯將分組賽頭四輪嘅賽程收晒入11日內完成，高普亦順勢call多啲人試腳之餘亦都將佢哋分成兩大隊（兩張名單之中只有奧格斯堡門將達文係重複），而喺研究第一期對荷蘭嘅24人名單嘅時候，我哋大概可以分析出高普最想先處理邊啲問題。
首先喺防線上，我哋見到高普重新起用長年俾紐亞壓住難以發圍嘅達史迪根（Marc-André ter Stegen，巴塞外借阿積士，國家隊正賽有20場正選上陣紀錄），睇嚟係要穩陣行先，利用達史迪根相對豐富嘅國際賽經驗解決「後紐亞時代」帶嚟嘅一大不安因素。其次更重要係右閘完全棄用甘美治（Joshua Kimmich，拜仁慕尼黑）客串嘅打法，呢套僅係整體上利多於弊嘅安排隨住甘美治踏入「三字頭」慢慢變成弊多於利，而尋找正印右閘就變成當要急務，因此可以見到名單出現咗華格路文（Josha Vagnoman，史特加）以至菲臘德魯（Philipp Treu，弗賴堡）呢類傳統右閘。

然後，當甘美治確認回歸中場中控制大局、唔需要分心去兼任防線死守嘅職責，高普就要諗點樣圍繞甘美治重建一條夠硬淨而有有效率嘅中場線。因傷錯過世界盃嘅列斯聯防中史達治（Anton Stach）與及轉投弗賴堡即成為主力嘅恩格赫治（Yannik Engelhardt）都會係嚟緊負責掩護甘美治嘅候選人物。

第三步要提升番進攻速度，賓福特24歲左翼沙達（Kevin Schade）重新入選，以至首次徵召有摩洛哥青年軍背景嘅23歲法蘭克福中鋒艾邦達利比（Younes Ebnoutalib），都睇得出係搵定多幾個升反擊威脅嘅方案，以擺脫近年「死猜爛猜」但又轉化唔出有效射門嘅醜態。

但國家隊賽事不嬲係穩陣先行，加上埋班操練時間有限，陣容輪換點都密過球會好多，高普大概都知冇可能就咁將高位逼搶打法直接移植入德國隊、然後叫一眾球員瞬間轉mode。喺現實部署上，德國先喺壓逼同控球之間搵番個平衡點、減少壓前所曝露嘅後防缺口先至係當前要務。