2026年4月世界排名: 10
世界盃往績：四屆冠軍，近兩屆分組賽出局
教練：拿高士文（德國）

---

德國2014年喺巴西贏得第四次冠軍，打後卻係連續兩屆分組賽出局，戰術單一、可預測度高係路維、費歷克兩代教練交接期間冇乜處理過嘅問題。而拿高士文接棒之後最令人記得嘅舉動，除咗係2024年主場出戰歐國盃前將通天老倌甘美治（Joshua Kimmich，拜仁慕尼黑）安放落右閘騰空中場一個名額，就已經要數到勸掂中場派牌大師卻奧斯復出，與及今次說服2014年奪冠功臣、已夠40歲嘅門將紐亞（Manuel Neuer，拜仁慕尼黑）參加個人第五次世界盃。昔日教拜仁嗰陣不時都傳出拿高士文、紐亞有心病，如今拿高士文放下身段請紐亞出山，不難睇出前者係對手上嗰套陣容頗冇信心。

德國呢套陣容喺近一年嘅一系列賽事中已大致成形，僅有嘅變動多係源於傷患（例如副選嘅前鋒貝卡特、攻中基拿比、防中史達治以及後衛安利簡）需要替補。而論驚喜程度，歐國盃上梅斯亞拉（Jamal Musiala，拜仁慕尼黑）搭配穫斯（Florian Wirtz，利物浦）嘅進攻組合大概已經俾各大強隊仔細研究過。如今梅斯亞拉係一位曾經傷出近半年、狀態仍在慢慢爬緊嘅進攻靈感來源。穫斯與及中鋒禾達美迪（Nick Woltemade，紐卡素）兩個德甲風頭躉都剛喺過去一個球季登陸英超未竟全功，前者適應咗大半季總算獲得認可，後者去到季尾則已經失去好多機會、甚至要移後打攻中，已喺英超踢咗幾季嘅「假9」夏維斯（Kai Havertz）幫到阿仙奴重拾失落22年嘅聯賽冠軍，已算係較有表現嘅一位。上述四個以至18歲攻中卡爾（Lennart Karl，拜仁慕尼黑）嚟緊點樣配置打嘅位與及落場時間，將好影響到德國嘅入球能力。

至於後防方面，當舒洛達碧克（Nico Schlotterbeck，多蒙特）夥拍莊拿芬達（Jonathan Tah，拜仁慕尼黑）嘅中堅組合已經冇乜懸念，call紐亞歸隊嘅賭博成份比前年重召卻奧斯就過之而無不及。參考紐亞今季代表拜仁慕尼黑打歐聯嘅表現，佢仍然可以踢出超高水準，但只要腳傷舊患再次召喚，球隊後防又要學習適應二號門將。呢方面拜仁要打一整年聯賽尚有足夠嘅緩衝空間（拜仁二號門將埃碧話唔定就係因為要讓位俾紐亞而落選），而去到世界盃打盡都只係八場，拿高士文仍夠膽去搏，恐怕都只係因為後防線人選級數未盡如意。

講到尾，如果拿高士文喺調兵遣將方面仍然好講究論資排輩、當高可預測性成為常態，不論列強抑或新丁都會視德國為一個容易搵到破解方案嘅對手。

 

分組賽賽程（香港時間）
15/06/2026 (01:00) 德國 vs 庫拉索
21/06/2026 (04:00) 德國 vs 科特迪瓦
26/06/2026 (04:00) 厄瓜多爾 vs 德國

---

入選名單:

名單更新日期:02/06/2026