2026年4月世界排名: 18
世界盃往績：近兩屆十六強
教練：森保一（日本）

---

日本國家隊本已晉身世界盃常客，上屆發展到喺分組賽接連擊敗德國同西班牙，雖則最終同樣係十六強出局（法定時間賽和當屆季軍克羅地亞），但大家已認定呢隊日本已上升到另一層次。日本今屆繼續由森保一執教，外界本來預期佢哋再上一層樓，奈何係大量主力受傷落選，令佢哋喺本來已預咗難打嘅F組迎嚟更大挑戰。

日本上屆最令人驚豔之處，係全隊能夠快速做攻守轉換，甚至可以喺同一場波上下半場踢出唔同嘅面貌，殺對手一個措手不及。呢套打法除咗要有星級戰將喺有需要時改變戰局，亦需要場上以至一眾後備球員都對執行戰術以至中途改變戰術有上佳嘅認知與及適應能力。從今年熱身賽贏英格蘭所見，森保一睇嚟都知道呢招「奇襲」並唔可以無限量使用落去，進而推出咗先用邊路猛攻、再切換防守陣式將勝果守到最尾嘅新打法。而作為日本隊icon嘅白禮頓翼鋒三笘薰臨近公佈26人名單先至重傷，絕對係對日本嘅一次沉重打擊。再加上另一位踢摩納哥嘅翼鋒南野拓實同告受傷，日本嚟緊不論想執行邊種打法都難免需要重新演練與及評估成效，新升任隊長但今季轉會法蘭克福踢得鬱鬱不得志嘅堂安律，則要承擔更多進攻得分與及牽制對手嘅責任。

日本上屆善用不同球員嘅特性踢出上下場截然不同嘅打法，有更多球員因此有機會落場搏殺，而森保一本來亦放晒風唔會徵召未完全康復嘅球員，但最終佢仍要食言，召入仍未好番晒嘅利物浦防中遠藤航，就連德甲弗賴堡攻中新秀鈴木唯人鎖骨受傷都叫咗入隊先再算，某程度上已反映日本喺人選上已面臨供應短缺嘅非常狀況。類似問題同樣發生喺後防線上：右閘富安健洋俾阿仙奴放棄，捱過咗半季先至搵到阿積士落班，但就係呢段空白期令到富安遲遲未能回復十足狀態，中堅伊藤洋輝則喺拜仁慕尼黑傷多過踢，但日本已經失去咗大器晚成嘅町田浩樹、另一中堅板倉滉轉投阿積士亦沉寂咗唔少，夠份量嘅替補人選已經唔多。呢個時候森保一重召近兩年只代表日本踢過三場波嘅39歲左閘長友佑都（將會係第五次出席決賽週），你可以話係嘥咗個名額，但從另一角度睇，日本呢個時候可能更加需要一個經驗豐富、能夠團結上下嘅人物帶領渡過難關。

分組賽賽程（香港時間）
15/06/2026 (04:00) 荷蘭 vs 日本
21/06/2026 (12:00) 突尼西亞 vs 日本
26/06/2026 (07:00) 日本 vs 瑞典

---

入選名單:

名單更新日期:02/06/2026