30/06/2026 巴西 vs 日本

足球資訊 | 2026世界盃 | 發布日期: 28/06/2026

排名:

直播資訊: Now 616/618

日本殿堂級動畫《足球小將》講咗幾十年嘅戲碼巴西對日本，嚟到2026年終於可以喺世界盃決賽週上演。日本喺分組賽階段克服到成軍時嘅傷兵潮，三場波所見張弛有度，巴西則通過一場場嘅實戰搵出較為平衡嘅陣容同打法，兩隊喺世界盃首設嘅三十二強階段合演夢幻戲碼，雙方臨場點樣互動博奕將會係球迷關注嘅焦點所在。

上屆日本踢分組賽先後贏晒德國、西班牙，但一進入淘汰賽劇情急轉直下，輸俾當屆季軍克羅地亞，唔少fans都大嘆可惜。今次日本最後一場分組賽對瑞典，雙方卻似係各懷心事，肉搏鏡頭欠奉之下大家各取一分出線就算，隊長後衛板倉滉更係輕微受傷就已經匆匆退下火線小心為上。事實上，當時日本數字上仍有可能反超荷蘭進佔F組首名，但從戰況所見教練森保一早已係選取咗較保守嘅打法，似係早已準備保留實力迎接巴西。

森保一大概係參考咗去年友賽反勝巴西嘅經驗，與及對手上班底嘅進度感到滿意。回想番世界盃開波前日本先後失去左翼三笘薰同埋防中遠藤航，大家都灰到極點，但隨後見到中村敬斗迅速接管左翼位置，維持到邊路嘅攻擊活力，加上另一邊堂安律與及鎌田大地亦持續俾到高效率傳中，令日本兩條邊路重新成為進攻利器。而防守方面，防中位置空缺有佐野海舟分擔亦有田中碧可作次選，再有守門員鈴木彩艷多次高難度撲救成為日本防線堅強後盾，令日本隊喺控球率唔高嘅情況之下仍能夠喺關鍵時刻頂得住對手嘅壓迫，再憑高效率進攻爭取入球。

而日本呢場「夢幻對決」嘅對手巴西，則係借分組賽階段慢慢磨合，嘗試搵番最引以為傲嘅進攻火力。巴西喺三場分組賽從僅和摩洛哥到輕取海地、蘇格蘭，控球率平均都只係維持喺54%咁上下，同巴西一貫俾人控球同短傳組織嘅印象有啲出入，但佢哋傳球成功率平均仍有89%。前線方面右翼、中鋒兩個位置起初都係有啲走樣，畢竟最初負責右翼位嘅拉芬拿喺巴塞隆拿踢左翼為主，首場出任正選中鋒嘅伊哥泰亞高（Igor Thiago）又只係嚟到今年先首次入選國家隊，要伊哥泰亞高咁早擔大旗係有啲要求高咗，而拉芬拿要讓出左翼位置俾獨自發亮嘅雲尼素斯（Vinicius Junior）亦係有啲嘥料。轉機反而出現喺第二場分組賽，當教練安察洛堤改派經驗較多嘅曼聯前鋒根夏（Matheus Cunha）居中，鋒線威力隨即增加（根夏面對海地、蘇格蘭共入三球），即使輪到拉芬拿傷出（今場對日本仍要缺席），頂上嘅拉恩（Rayan，般尼茅夫）亦有足夠時間空間pick up。再加上千呼萬喚，入隊即傷嘅攻中尼馬（Neymar Jr.）終於喺對蘇格蘭一役最後時間落場，證明安察洛堤選佢入隊唔係齋做吉祥物，嚟緊亦期望佢喺進攻方面俾到巴西更多創造力。

因應巴西預計會逐漸提升番個火力，日本能否喺長期受壓下鞏固防守然後突擊將會係呢場三十二強會戰嘅焦點所在。另一方面亦都可以留意日本能否參考摩洛哥囤兵中路、集中招呼巴西中場卡斯美路（Casemiro）嘅打法，以創造更多轉守為攻嘅機會。

分類:

足球資訊

30/06/2026 巴西 vs 日本

分類:

標籤:

關於我們:

快速連結:

聯絡我們: