25/06/2026 瑞士 vs 加拿大

足球資訊 | 2026世界盃 | 發布日期: 23/06/2026

排名: 世界(17) vs 世界(28)

直播資訊: Now 616/618

大概係參考咗去年美國世冠盃嘅情況，嚟到今屆世界盃強制喺各場賽事半場中段加入咗稱為hydration break嘅補水休息時間。雖然呢種「強制水break」俾人話係國際足協純為恆常插播廣告嘅商業化操作，亦有唔少人覺得足球比賽從此就分割成四小節失去本有嘅連貫性，但始終推行「水break」涉及嘅人道考慮你好難完全否定，再加上當講明「水break」係常設之後，各隊更加能事先安排更配合比賽節奏嘅戰術部署，反而令比賽更具公平性和可預見性，而亦都有隊伍開始識得利用呢個新增嘅時機調整戰術、重新激發球隊士氣，呢招喺下半場尤其見效，而暫時做得最得心應手嘅則首推瑞士。

（稍為尷尬一幕在於：I組法國對伊拉克因為暴雨長時間中斷，打後嘅下半場冇再放水break）

以瑞士第二輪分組賽對波斯尼亞為例，「強制水break」就成為咗成場比賽嘅分水嶺。當時比數仍係0:0，瑞士主帥耶堅利用第71分鐘嗰陣嘅小休激勵全隊之餘，更係一口氣換入咗文森比（Johan Manzambi）、蘇維（Djibril Sow）兩位中場與及翼鋒魯賓華加斯（Ruben Vargas），三人迅速入局令全隊面貌同氣勢都出現大幅度改變。其中華加斯與及我哋早已提過或會係X-factor嘅20歲新秀文森比貢獻尤其突出，文森比落場冇耐已打開紀錄兼夾令波斯尼亞後衛穆哈里莫域領紅，整輪攻勢亦係緊接「水break」展開。同慣常60分鐘開始換人嘅節奏唔同，球隊拖到「下半場水break換人」需要承受更大風險，但如果係較有板凳深度嘅球隊，當對手跟慣例60分鐘左右換人而自己再遲10分鐘先嚟大幅度換人，入替嘅球員本身又有一定質素嘅話，佢哋變成同大隊一齊從靜止起動之餘，一旦成功改變戰局，對手就更加「冇仇報」。

瑞士第一場只能賽和卡塔爾係有啲失手，但經過波斯尼亞一役後，相信耶堅會更識點樣喺平衡進攻火力與及維持神秘感，善用呢位年僅20歲而又具備爆發力嘅弗賴堡中場。再睇番B組形勢，由於次名好大機會出到十六強就已經要面對荷蘭或者摩洛哥，嚟緊第三輪瑞士面對東道主加拿大，定必力爭三分唔會禮讓。

加拿大安排到分組賽最後兩輪都留喺溫哥華踢，大家都以為係絕對優勢，但又點會估到喺BC Place嘅首戰即遇上核心中場伊斯馬爾干尼重傷斷腳，五日後又要喺番同一地點作賽，加拿大球員難免會多咗重心理陰影。佢哋上場做得最正確係趁卡塔爾長時間踢少兩個之下盡數（淨得失球暫比瑞士多三個），單計中鋒約拿芬大衛（Jonathan David）就已上演帽子戲法，今場對瑞士只要守和，都仍然可以以B組首名身份出線。喺呢個背景之下，教練馬殊要唔要放準備復出嘅左閘艾方素戴維斯（Alphonso Davies）落場就有較大彈性，此外第二輪接替干尼嘅安德列治中場尼敦戴倫沙利巴（Nathan-Dylan Saliba）一落場就憑自由球得分，嚟緊喺主隊球迷支持下有望維持到一定水準，同全隊一齊迎接瑞士嘅挑戰。

分類:

足球資訊

25/06/2026 瑞士 vs 加拿大

分類:

標籤:

關於我們:

快速連結:

聯絡我們: