2026世界盃 - B組加拿大 | 大數據預測中心

2026世界盃 - B組加拿大

足球資訊 | 2026世界盃 | 發布日期: 07/06/2026

2026年4月世界排名: 30
世界盃往績：兩屆分組賽出局
教練：馬殊（美國）

加拿大國家隊將以東道主身份出戰2026年世界盃決賽週，都只不過係佢哋嘅第三次世界盃之旅。加拿大係主辦國之一，無需參加中北美洲區外圍賽而自動獲得決賽週資格，而分組抽籤嗰期嘅世界排名只係排到27，屬三個東道主之中最弱嘅一隊，本應只算係第三檔嘅級數，而主辦國身份就令佢哋進佔咗B組第一檔，再加上B組最後一個席位並唔係預期中由意大利獲得，牌面上想創最佳紀錄突破分組賽階段會容易咗，但對於失落帶領祖國主場出戰世界盃機會嘅美籍教練馬殊嚟講，拆解後防嘅多個「炸彈」先至係當前急務。

備戰方面，加拿大主要透過2024/25中北美洲國家聯賽與及2025年美洲金盃累積大賽經驗。去年六月加拿大喺冇徵召中場尤斯達基奧（Stephen Eustaquio，當時因要代表波圖參加世冠盃而缺席）之下，喺美洲金盃八強就已經行人止步，俾危地馬拉互射十二碼淘汰，但參考番對上三個月嘅國家聯賽四強階段，陣容較為完整嘅加拿大輸俾墨西哥後喺季軍戰贏番美國一場，已算係有所交代。

加拿大嘅大賽經驗比其餘兩個主辦國都要少，好在喺上屆已能夠憑外圍賽成績打入決賽週，雖然一如所料喺分組賽階段已經三振出局，一班骨幹成員總算獲得到寶貴經驗。當時單天保至尊甚至要打前鋒嘅左閘阿方素戴維斯（Alphonso Davies，拜仁慕尼黑）仍然擺脫唔到傷患困擾，但圍繞住佢嘅一班隊友總算有部分跟上步伐。其中中鋒約拿芬大衛（Jonathan David，祖雲達斯）自喺法甲里爾冒起後繼續保持穩定入球紀錄，雖然2025/26球季轉投祖雲達斯後發展唔算得上係順利，但佢喺國家隊已成為最穩定嘅入球來源，更已成為加拿大入球王。嚟緊加拿大能否跨過小組賽呢關，應會好視乎全隊能否將約拿芬大衛嘅入球效率放到最大。此外再加上22年卡塔爾決賽週未有入選嘅左中場沙菲爾堡（Jacob Shaffelburg，FC洛杉磯）開始上位，阿方素戴維斯確係較有可能退番去佢最擅長嘅左閘位置，整體更能執行到教練馬殊嗰套高強度前場壓迫、邊路快放出波嘅風格。

但講到尾，成隊波從場上以至更衣室中，仍係好睇阿方素戴維斯頭。喺初選名單公佈時戴維斯仍係有傷在身，需要一直留喺拜仁復健延遲歸隊，最近期嘅消息亦預咗佢將未趕及首場分組賽（多倫多迎戰波斯尼亞）落場。除此以外加拿大成條後防線仍係充滿不明朗因素，主力中堅戴歷哥尼利斯（Derek Cornelius，馬賽）近一季外借格拉斯哥流浪一直養傷，2026年更係一場正賽都冇踢過，仍需要爭取時間回復狀態。此外有傳另一中堅摩斯龐比圖（Moise Bombito，尼斯）趕唔切康復，嚟緊係俾富咸U21外借丹達嘅20歲小將洛迪科基路利斯（Luc De Fougerolles）上位，定抑或補選另一位仍在康復當中嘅大佬卡姆米拿（Kamal Miller，波特蘭伐木者），都勢將影響加拿大嘅備戰進程。

分組賽賽程（香港時間）
12/06/2026 (03:00) 加拿大 vs 波斯尼亞（ViuTV 99台及網絡平台免費直播）
19/06/2026 (06:00) 加拿大 vs 卡塔爾
25/06/2026 (03:00) 瑞士 vs 加拿大

入選名單:

號碼	姓名	位置	球會
9	拿連 Cyle Larin	前鋒	馬略卡
10	約拿芬大衛 Jonathan David	前鋒	祖雲達斯
11	利安米拿 Liam Millar	前鋒	侯城
12	奧奴華斯爾 Tani Oluwaseyi	前鋒	維拉利爾
14	沙菲爾堡 Jacob Shaffelburg	前鋒	FC洛杉磯
17	保查蘭 Tajon Buchanan	前鋒	維拉利爾
24	聖基萊斯聯 Promise David	前鋒	龐馬斯大衛
26	馬些路科利斯 Marcelo Flores	前鋒	堤格雷斯
6	馬菲奧祖尼亞 Mathieu Choiniere	中場	FC洛杉磯
7	尤斯達基奧 Stephen Eustaquio	中場	FC洛杉磯
8	伊斯馬爾干尼 Ismael Kone	中場	薩斯索羅
20	阿里艾密 Ali Ahmed	中場	諾域治
21	莊拿芬奧蘇里奧 Jonathan Osorio	中場	FC多倫多
23	歷高施古亞 Niko Sigur	中場	夏德
25	尼敦戴倫沙利巴 Nathan-Dylan Saliba	中場	安德列治
2	阿里斯達莊士東 Alistair Johnston	後衛	些路迪
3	艾菲鍾斯 Alfie Jones	後衛	米杜士堡
4	洛迪科基路利斯 Luc De Fougerolles	後衛	丹達
5	祖爾禾達文 Joel Waterman	後衛	芝加哥火焰
13	戴歷哥尼利斯 Derek Cornelius	後衛	馬賽
15	摩斯龐比圖 Moise Bombito	後衛	尼斯
19	艾方素戴維斯 Alphonso Davies	後衛	拜仁慕尼黑
22	拿耶亞 Richie Laryea	後衛	FC多倫多
1	辛基亞 Dayne St. Clair	門將	國際邁亞密
16	基比奧 Maxime Crepeau	門將	奧蘭多城
18	奧雲葛文 Owen Goodman	門將	班士利

姓名	位置	球會
拿連 Cyle Larin	前鋒	馬略卡
約拿芬大衛 Jonathan David	前鋒	祖雲達斯
利安米拿 Liam Millar	前鋒	侯城
奧奴華斯爾 Tani Oluwaseyi	前鋒	維拉利爾
沙菲爾堡 Jacob Shaffelburg	前鋒	FC洛杉磯
保查蘭 Tajon Buchanan	前鋒	維拉利爾
聖基萊斯聯 Promise David	前鋒	龐馬斯大衛
馬些路科利斯 Marcelo Flores	前鋒	堤格雷斯
馬菲奧祖尼亞 Mathieu Choiniere	中場	FC洛杉磯
尤斯達基奧 Stephen Eustaquio	中場	FC洛杉磯
伊斯馬爾干尼 Ismael Kone	中場	薩斯索羅
阿里艾密 Ali Ahmed	中場	諾域治
莊拿芬奧蘇里奧 Jonathan Osorio	中場	FC多倫多
歷高施古亞 Niko Sigur	中場	夏德
尼敦戴倫沙利巴 Nathan-Dylan Saliba	中場	安德列治
阿里斯達莊士東 Alistair Johnston	後衛	些路迪
艾菲鍾斯 Alfie Jones	後衛	米杜士堡
洛迪科基路利斯 Luc De Fougerolles	後衛	丹達
祖爾禾達文 Joel Waterman	後衛	芝加哥火焰
戴歷哥尼利斯 Derek Cornelius	後衛	馬賽
摩斯龐比圖 Moise Bombito	後衛	尼斯
艾方素戴維斯 Alphonso Davies	後衛	拜仁慕尼黑
拿耶亞 Richie Laryea	後衛	FC多倫多
辛基亞 Dayne St. Clair	門將	國際邁亞密
基比奧 Maxime Crepeau	門將	奧蘭多城
奧雲葛文 Owen Goodman	門將	班士利

名單更新日期:07/06/2026

分類:

足球資訊

2026世界盃 - B組加拿大

分類:

標籤:

關於我們:

快速連結:

聯絡我們: