10/07/2026 法國 vs 摩洛哥

足球資訊 | 2026世界盃 | 發布日期: 07/07/2026

直播資訊: Now 616/618, ViuTV 99

1998年主場出擊嘅法國隊贏得首個世界盃冠軍，當時法國嗰套多元嘅「3B陣容」（Black, Blanc, Beur，即黑人、白人、阿拉伯裔人）亦係令人大開眼界：例如防中韋拉係前殖民地塞內加爾嘅移民，就算係白人中場皮里斯，佢其實都係擁有法國同葡萄牙嘅雙重國籍，而隨住移民落地生根，好似球王施丹呢類生於法國嘅移民後裔就逐漸成為主流。今屆世界盃單計大巴黎地區出世嘅球員，就已經散佈喺五支國家隊之中。

時代一直在變，法國仍然可以循呢啲途徑不斷吸收新血，例如今屆已射入七球嘅前鋒麥巴比（Kylian Mbappe），佢喺巴黎出世，本來係可以考慮跟番爸爸入喀麥隆，或者跟媽媽嗰邊嘅阿爾及利亞，更複雜嘅例子就要數到今屆已累積六個助攻嘅奧利斯（Michael Olise）：佢有來自尼日尼亞嘅爸爸與及阿爾及利亞嘅媽媽、生於英國倫敦，但最終因為佢媽媽已擁有法國國籍，喺英格蘭、法國嘅U隊兜兜轉轉幾年之後，人人都想爭嘅奧利斯無懼位置上嘅激烈競爭揀咗代表法國，轉眼間已成為法國隊不可或缺嘅進攻核心。

但長期作為「人才輸出地」嘅非洲國家並唔係坐以待斃。就以摩洛哥為例，佢哋一直四出發掘海外移民後代「認祖歸宗」，就算未能早日將佢哋招攬入青訓系統，亦都會嘗試盡最後努力邀請佢哋代表大國腳參賽。再加上有份主辦下屆世界盃呢啲額外因素，摩洛哥對擁有雙重國籍嘅年輕球員嚟講係幾有吸引力。繼前年從西班牙手中搶嚟右翼巴謙迪亞斯（Brahim Diaz，決賽週至今已錄得四次助攻），摩洛哥今屆世界盃前再成功趕尾班車，說服到法國出世、喺里爾青訓系統長大、青年軍一直踢緊法國嘅中場保亞迪（Ayyoub Bouaddi）「加盟」。就喺今屆48隊嘅名單之中，摩洛哥就有高達73%嘅球員係喺海外出世，僅次於庫拉索與及剛果民主共和國，或多或少反映咗近年人才流動喺規例限制之下嘅發展新趨勢。

現時仍只係18歲嘅保亞迪去到五月先首次為摩洛哥披甲，但已經立即拍住土生球員奧拿希（Azzedine Ounahi，基羅納）與及同樣生於法國嘅艾拿奧爾（Neil El Aynaoui，羅馬）組成中場核心。喺上一仗淘汰其中一隊主辦國加拿大嘅十六強賽事之中，打攻中嘅奧拿希就梅開二度，但呢場淨贏三球嘅勝仗既喜且悲，摩洛哥上半場意外地陷於被動不特止，剛俾拜仁慕尼黑簽入、今期充當「假九」嘅沙巴利（Ismael Saibari）肌肉受傷提早離場，情況並不樂觀。沙巴利喺分組賽期間就已經射入三球，佢如果最終一如所料缺陣，叫左翼拉希美（Soufiane Rahimi）移前就已經唔係最好嘅選擇。再加上踢水晶宮嘅主力中堅利亞特（Chadi Riad）喺再早一場淘汰荷蘭嘅三十二強賽事已經傷出，嚟緊能否上陣亦都係成疑。

另一方面，外界一致認為陣容無敵嘅法國亦開始要面對主力受傷患與及停賽風險影響嘅問題。早喺決賽週前介紹法國嗰陣，我哋已經提及過法國中場行精兵制嘅潛在風險，而喺防中曹亞文尼（Aurelien Tchouameni）有傷避戰嘅十六強賽事中，對手巴拉圭踢法粗野令場波充滿火藥味，改踢正選中場嘅干尼（Manu Kone）級數稍有不及就即刻食牌，就連翼鋒巴高拿（Bradley Barcola）甚至奧利斯都係遭殃領黃。假如今場對摩洛哥佢哋再食牌，就等唔到洗牌機會需要即時停賽一場，咁樣或多或少都會影響到佢哋今場嘅進取程度。稍為慶幸嘅係，法國喺十六強嘅另一勁敵——高溫天氣，嚟緊喺波士頓一戰將有望得到舒緩，再加上摩洛哥自己亦有多名主力出戰成疑，就算摩洛哥有保亞迪呢位熟知法國青訓系統嘅「內應」，上屆四強嘅復仇劇本（輸0:2）想要上演仍有一定難度。

分類:

足球資訊

10/07/2026 法國 vs 摩洛哥

分類:

標籤:

關於我們:

快速連結:

聯絡我們: