23/06/2026 阿根廷 vs 奧地利

足球資訊 | 2026世界盃 | 發布日期: 22/06/2026

排名: 世界(1) vs 世界(21)

直播資訊: Now 616/618

衛冕冠軍阿根廷喺2026年世界盃嘅首戰中展現強大實力，3:0輕取阿爾及利亞，喺第一輪完後世界排名更係超越法國、登上世一。球王美斯（Lionel Messi）今場大演帽子戲法，總共累積16個世界盃入球追平咗史上最佳射手高路斯（德國），更成為38歲最高齡完成帽子戲法嘅球員。

美斯今場本身攻擊效率固然係極之高，射六中四就已係三次破門，顯示狀態極佳。馬後炮咁講，美斯自贏得上屆世界盃後決定改打MLS，三年嚟已適應咗北美嘅氣候以至競賽環境，首場所表現出嘅良好狀態已證明當初係行啱咗重要一步。此外亦要多得阿爾及利亞防守漏洞明顯，再加上門將盧卡施丹一再失誤，令美斯得以捕捉多次破門良機。全場阿根廷控球率超過60%，除咗美斯以外整體都呈現出良好嘅備戰成果，例如與美斯同屬國際邁亞密嘅迪保羅（Rodrigo de Paul）與及麥卡里士打（Alexis Mac Allister）喺中場協調合作有效瓦解對手防線，加上中後場密集壓迫令對手難以組織反攻，現時最能令美斯失準嘅因素，可能就得番場外正係病重嘅爸爸。

牌面上阿根廷嚟緊會較有容錯空間，相比之下奧地利如果一如所料以J組次名出線，出到三十二強其實好大機會就要遇上假設能夠及時回勇嘅西班牙，因此今場未必會輕言放棄。奧地利首仗克服攻中鮑加特拿重傷退隊嘅打擊，而教練蘭歷克使出嘅招數好易估到就係叫萬能球員拉馬（Konrad Laimer）頂上攻中位置，最終安然渡過約旦呢關。稍為失算嘅係贏得到約旦但再傷埋右閘普舒（Stefan Posch）。

今次普舒下巴骨折雖然唔洗做手術、戴上護托後已重新投入訓練，但為避免佢傷勢惡化，蘭歷克好大機會改派拉馬頂替右閘位呢個空缺。如果呢個調動成真，拉馬將會專門負責mark實美斯，減少呢位球王嘅發揮空間。與此同時教練團亦有兩手準備，做對手嘅影片分析時已避免過度專注睇美斯，以免後防球員俾單調嘅戰術思路框住咗，目標係要同時防範埋另外兩位前鋒球星拿達路馬天尼斯（Lautaro Martinez）、以及勢將會爭取到更多落場時間嘅艾華利斯（Julian Alvarez）。中場組織方面，奧地利「新請番嚟」嘅兩位新秀卓古麥卡（Carney Chukwuemeka）與及保羅雲拿（Paul Wanner）喺對約旦時已經順利登場，連埋補時踢咗最後四十分鐘，話唔定蘭歷克今場又會用同類手法安排突擊。

分類:

足球資訊

23/06/2026 阿根廷 vs 奧地利

分類:

標籤:

關於我們:

快速連結:

聯絡我們: