2026年4月世界排名: 1
世界盃往績：兩屆冠軍，上屆亞軍
教練：迪甘斯（法國）

---

從名宿化身為名帥嘅迪甘斯賽前早已確認，決賽週完後將會交棒俾同代名宿施丹。迪甘斯喺法國嘅最後一項任務，就係要將手上呢班天才橫溢兼已獲獎無數嘅團隊團結起嚟，繼2018年奪冠後再一次衝擊世界盃冠軍、創造歷史。

法國人才滿瀉已係人所共知，佢哋今期除咗網羅成功衛冕歐聯冠軍嘅五位巴黎聖日耳門球員，陣中更有歐霸盃冠軍隊主力後衛甸尼（Lucas Digne，阿士東維拉），前鋒馬迪達（Jean-Philippe Mateta）與及後衛拿確斯（Maxence Lacroix）亦都因為協助水晶宮贏得歐協聯冠軍，成功爭取曝光得以首次參加大賽。咁高嘅含金量喺近代國家隊嚟講算係罕見，但當然呢啲銜頭都只能作參考之用，仍需要臨場睇下佢哋真係正值巔峰定抑或已被超密集嘅球會賽程所拖垮。正例如同樣打入歐聯決賽但輸波嘅主力中堅沙列巴（William Saliba，阿仙奴），就係因為捱埋個決賽令到背傷惡化。

至於法國公佈26人名單前夕較為重大嘅人手損失，除咗皇馬後衛費蘭特文迪以外就要數到今季轉會踢利物浦嘅前鋒伊基迪基，但法國最人滿之患嘅位亦就喺前線。隨住基奧特、基士文幾位老將淡出，隊長麥巴比（Kylian Mbappe，皇家馬德里）獨大得嚟亦有新血補充接棒，其中最大收獲一定要講到喺巴黎聖日耳門從翼鋒成功改造為中鋒嘅迪比利（Ousmane Dembele），呢幾年間佢已蛻變成為歐聯冠軍主將，佢同麥巴比打法上可以互換位置將為迪甘斯調兵遣將帶來極大彈性，佢本人亦有望改善國際賽入球數量偏低嘅尷尬往績。再加埋喺拜仁慕尼黑踢到出神入化嘅24歲翼鋒奧利斯（Michael Olise），就算PSG兩翼巴高拿（Bradley Barcola）、杜爾（Desire Doue）同樣有好表現都大有機會要屈居後備。

法國嘅人滿之患去到一個點，就係夠膽連一啲近況未達最佳嘅大球會球員都排除在外，例如冇選上嘅卡馬雲加（皇馬中場）、巴迪亞舒尼（車路士後衛）、高路梅安尼（祖雲達斯前鋒）、卓法利（PSG門將），差唔多已可以砌出另一隊有爭勝能力嘅隊伍。但與此同時，呢條以曹亞文尼（Aurelien Tchouameni，皇家馬德里）為核心嘅中場一冇埋卡馬雲加又顯得略為單薄，嚟緊就要睇下迪甘斯有冇計錯數。

分組賽賽程（香港時間）
17/06/2026 (03:00) 法國 vs 塞內加爾
23/06/2026 (05:00) 法國 vs 伊拉克
27/06/2026 (03:00) 挪威 vs 法國

---

入選名單:

名單更新日期:04/06/2026