21/06/2026 德國 vs 科特迪瓦

足球資訊 | 2026世界盃 | 發布日期: 20/06/2026

排名: 世界(9) vs 世界(31)

直播資訊: Now 616

今屆世界盃已完成分組賽首輪賽事，其中德國終於終止咗連續兩屆首場即輸波嘅魔咒，更係以7:1大勝庫拉索，球隊以至球迷都暫時鬆一口氣。呢場波本來擔心未上力嘅梅斯亞拉（Jamala Musiala）以及穫斯（Florian Wirtz）表現都十分搶鏡，各自貢獻入球之餘，助攻組織同樣有質素。防中菲歷斯尼美查（Felix Nmecha）玩從後插上以及意外擔任正選嘅左閘尼敦布朗（Nathaniel Brown）都俾到驚喜，而屈居後備改打攻中嘅安達夫（Deniz Undav）亦爭番啖氣交出一個入球兩次助攻，令整條前鋒線層次更加立體。咁當然你知我知，第一場德國嘅對手只係世界盃初哥庫拉索，德國嘅硬淨程度用嚟緊呢場對科特迪瓦嘅比賽做評估會較有參考價值。而一切就要從隊長甘美治（Joshua Kimmich，圖左）身後面嗰個窿講起。

話說係咁嘅：教練拿高士文為咗兼用埋甘美治嘅傳控同埋中路推進功能，自前年歐國盃安排佢改打右閘之餘，亦會俾佢插上去到中場支援組織，所以喺拿高士文執教以嚟甘美治仍可以做到每百五分鐘就嚟一次入球或者助攻（對庫拉索就多咗兩個助攻進賬）。不過大家都應該已經估到，呢種打法係會犧牲咗德國防線嘅若干穩定性，即係右閘位容易空咗出嚟俾對手快翼放冷箭製造危機，早喺三月友賽，呢個時隱時現嘅窿就俾瑞士利用過，而咁啱今場對手科特迪瓦今期就係最叻玩兩翼，德國能否堅守既有打法係今場波嘅其中一個焦點。

回顧番科特迪瓦首場分組賽對厄瓜多爾，佢哋靠後備落場嘅左翼迪亞路（Amad Diallo）補時絕殺不在話下，就連一對正選翼鋒迪奧文迪（Yan Diomande，RB萊比錫）以及巴索馬拿托尼（Bazoumana Toure，賀芬咸）本身都喺德甲錄得時速36公里嘅最快段速，首戰佢哋輪流喺左右兩翼突破玩謝對手後衛，嚟緊對德國如無意外都會故技重施。

呢支科特迪瓦更有一浸優勢係在於多位主力都係現正或者曾經喺德國踢過波。除咗剛才提到嘅兩翼直情係踢緊德甲之外，主力中堅組合哥蘇奴（Odilon Kossounou）、尼迪卡（Evan Ndicka）都有頗長嘅德甲資歷，嚟緊對手點打佢哋亦應有所準備。值得注意係呢兩位中堅首仗同樣有傷在身，當中就只有哥蘇奴臨完場叫做落過場，而最新消息就係今場對德國佢哋兩位都已經準備好復出，再加上俾法蘭克福外借嘅中鋒華爾（Elye Wahi，圖右）亦都解決咗簽證問題可以入境加拿大，科特迪瓦陣容將會更加完整，可以預期對德國防線會構成較全面嘅考驗。

預計兩隊正選陣容：
【德國】
Neuer - Kimmich, Tah, N.Schlotterbeck, Brown - F.Nmecha, Pavlovic - Sané, Musiala, Wirtz - Havertz
【科特迪瓦】
Y.Fofana - G. Doué, Singo, Ndicka, Konan - Kessié, S.Fofana - Amad, Y.Diomande - Pepé, Bonny

分類:

足球資訊

21/06/2026 德國 vs 科特迪瓦

分類:

標籤:

關於我們:

快速連結:

聯絡我們: