世界盃G、H、I組第三輪賽前分析(27/06/2026)

足球資訊 | 2026世界盃 | 發布日期: 25/06/2026

直播資訊: Now TV

27/06/2026 03:00 I組挪威(世界22) vs 法國(世界2)

雙方均展現強大競爭力。挪威有Haaland（每場各入兩球）及隊長攻中Odegaard（每場一個助攻）維持高效配合，法國呢邊都有Mbappe兩場入兩球，另一前鋒Dembele亦終喺上場對伊拉克取得首個世界盃入球，但數到防線就以法國近況稍令人擔憂，尤其係門將位置，加上主帥Deschamps因為要奔喪將缺席呢場大戰，對臨場調動或帶來影響。

27/06/2026 03:00 I組塞內加爾(世界19) vs 伊拉克(世界60)

塞內加爾面對組內兩大熱門盡失六分，今場對伊拉克只望拎晒三分取得第三名再寄望夠分出線。但當球隊背後組織混亂嘅報導陸續出街，足見現時只係靠個別生性球員撐住大局。伊拉克雖然上場所見快速反擊具一定威脅，但防守協調、埋門一腳仍係較弱，整體進攻效率仍有待加強。雙方未有交手紀錄之下以塞內加爾較為秤先。

27/06/2026 08:00 H組佛得角(世界63) vs 沙特阿拉伯(世界59)

佛得角喺分組賽已係接連賽和西班牙同烏拉圭兩大出線熱門，展現出強烈韌性與速度優勢，家陣世界排名以至氣勢都再進一步追貼沙特加拉伯，佛得角主帥Bubista更係已將目標上調小組出線。沙特阿拉伯上場遇上Yamal增加落場時間帶動成條西班牙進攻線復蘇，自家球員下半場明顯出現疲態。雖然話沙特目前仍有贏波出線嘅可能，但本身勢弱就連佛得角都演化成為具競爭力嘅攔路虎。

27/06/2026 08:00 H組烏拉圭(世界18) vs 西班牙(世界3)

一場本以為係H組兩大熱門嘅例行公事最終成為烏拉圭嘅榮譽之戰。組織混亂及決心不足嘅烏拉圭喺分組賽第二場面對佛得角都只能取得平局，今場遇上復蘇嘅西班牙再有閃失嘅話甚至有機會俾佛得角搶佔埋小組第二。西班牙首場失威後搵沙特阿拉伯祭旗，果然Yamal一出就成隊生晒，而今場只要賽和就能確保H組首名出線資格，尚有些少空間去決定今場係唔係要為兩翼N.Willaims+Yamal安排進一步嘅熱身合作機會。

27/06/2026 11:00 G組埃及(世界27) vs 伊朗(世界21)

埃及喺上場對新西蘭落後一球後，下半場憑Salah帶動成功3:1逆轉贏波，展現一定韌性同反擊效率。今場遇著韌性更高更捱得打嘅伊朗，就算不勝而另一場比利時大炒唔起新西蘭，埃及都仍有機會以遠超預期嘅小組首名身份出線。另一方面伊朗如果今場再度不敗亦有機會出線，預期門將Beiranvand將再成為焦點。

27/06/2026 11:00 G組新西蘭(世界84) vs 比利時(世界10)

比利時黃金一代成員狀態一去不返，新晉骨幹Doku人生交叉點選擇咗請假侍產，最終第二場再度打和代價唔細。嚟到今場Doku回歸但就輪到23歲中堅Ngoy紅牌停賽，可能要到新西蘭撐到尾段體能下降先可以交出合符預期嘅偏大比數。

*各隊世界排名以第二輪完成後版本為準

分類:

足球資訊

世界盃G、H、I組第三輪賽前分析(27/06/2026)

分類:

標籤:

關於我們:

快速連結:

聯絡我們: