2026年4月世界排名: 31
世界盃往績：兩屆十六強
教練：蘇巴根（挪威）

---

挪威「近代」就只係1994、1998連續兩屆有打決賽週，挪威父老嘅美好記憶就一直停留喺98世界盃分組賽最後一仗戰勝巴西。而94世界盃僅亮相兩次嘅右閘艾夫夏蘭特，如今有囝囝艾寧夏蘭特（Erling Haaland，曼城）繼承父業，更係以世界級中鋒身份帶領國家隊重返世界盃。

2020年蘇巴根接過教練一職，普遍被認為係挪威衝擊世界盃決賽週嘅轉捩點。睇返晉級過程，挪威喺I組八戰全勝轟入37球，最後一戰作客更以4:1擊潰意大利，間接將佢哋送入無法翻身之路。期間球隊依賴絕對核心夏蘭特喺多場射入重要入球，佢同攻中奧迪哥特（Martin Odegaard，阿仙奴）喺英超各為其主，番到國家隊就踢得好有默契，合拍程度令國民對今次再闖決賽週抱有更大憧憬。

夏蘭特以1990年代國腳後代身份重新撐起國家隊，喺今期挪威陣中並唔係孤例，就連奧迪哥特，以至次席射手蘇諾夫（Alexander Sorloth，馬德里體育會）及中場圖斯特（Kristian Thorstvedt，薩斯索羅）都帶住呢個身份。攻中領袖奧迪哥特15歲就代表挪威大國腳出戰、18歲已升上皇馬一隊，幾經十年歷練今季終於帶領阿仙奴重獲英超錦標證明到自己。與此同時，蘇巴根保留上一代嚴密防守+直接長傳嘅打法之餘，再引入更多技術元素與及進攻上嘅自由度，希望俾到夏蘭特等進攻球員更多發揮空間。

喺剛過去嘅2025/26球季，幾乎清一色用番本地球員嘅挪威球隊波杜基林特喺歐聯成為攪局奇兵，先後出現主場贏過曼城、士砵亭、作客贏馬體會嘅賽果，十六強附加賽更係雙殺國際米蘭。雖然當中有賽程、氣候、場地等因素影響，但綜合嚟睇，已有唔少人視之為挪威今屆準備彈出嘅訊號。

分組賽賽程（香港時間）
17/06/2026 (06:00) 伊拉克 vs 挪威
23/06/2026 (08:00) 挪威 vs 塞內加爾
27/06/2026 (03:00) 挪威 vs 法國

---

入選名單:

名單更新日期:03/06/2026