2026年4月世界排名: 2
世界盃往績：2010年冠軍，近兩屆十六強
教練：迪拉富安特（西班牙）

---

西班牙自2010年登頂後一直被視作係大賽嘅必然大熱，近兩屆卻因不同原因早早就喺十六強階段出局。及後2024年歐國盃起用當時年僅16歲嘅巴塞隆拿右翼耶馬（Lamine Yamal），左翼歷高威廉斯（Nico Williams，畢爾包）從此有個伴遙遙呼應，西班牙亦因此成功將短傳滲透、高壓、直線推進看似唔能夠並存嘅操作集於一身，強勢奪得當屆EURO，亦加快咗教練迪拉富安特推動世代交替嘅步伐。「狂牛」今次挾歐洲皇者身份重踏世界盃賽場，本應係重振名聲嘅好時機，勢估唔到兩翼兩大天王同時喺五月先嚟受傷，雖然迪拉富安特仍然將佢哋兩個先收入陣中再等情況好轉，但全隊嘅備戰點都會因此而受到影響。

對於開賽有機會同時冇晒兩翼，樂觀睇法係分組賽賽程已提供咗方便：迪拉富安特大可以完成首兩場贏面較高嘅賽事（對佛得角、沙特阿拉伯），至再考慮有冇需要喺尾場對烏拉圭時出盡全力。參考英超阿仙奴連續兩季將中場馬連奴（Mikel Merino）推上前充當前鋒嘅做法，迪拉富安特亦大可以照辦煮碗，好等進攻可以多一個方案備用。不過當再拉遠啲睇，H組次名喺三十二強係安排要面對J組首名，即係好大機會要即刻硬撼衛冕冠軍阿根廷，由此睇嚟西班牙如果陣容不整有意無意丟失咗首名出線資格，個代價又未必係佢哋所願意付出嘅。（上屆E組尾場輸俾日本、次名出線即俾摩洛哥淘汰，前車可鑑）

撇除兩翼唔理住嘅話，焦點會番到洛迪（Rodri）身上，EURO 24一舉成功令呢位曼城防中順勢擸埋當季嘅金球獎，但隨後兩季都要不斷同傷患搏鬥，夾埋只係踢過不足50場正賽。只要佢健康嘅話，西班牙嘅節奏控制、反搶平衡同後場出波穩定性都可以更有保證，但如果以上三位都不幸不在狀態，奧耶沙巴（Mikel Oyarzabal，皇家蘇斯達前鋒）與及蘇比文迪（Martin Zubimendi，阿仙奴中場）受關注嘅程度勢必比名氣更高但經常受傷嘅巴塞中場雙子加維（Gavi）、柏迪（Pedri）為高。

此外，西班牙今期完全冇選用皇家馬德里球員亦成為球迷間嘅八卦話題。右閘卡華積已經34歲，就連皇馬自己都棄用，喺國家隊呢邊同步淡出本來就唔出奇，但荷蘭U19出身、轉籍西班牙即喺歐國聯擔正嘅中堅侯辛竟然同告落選，就令人極之詫異，而剩下嘅防線最老資格嗰位已係沙特掘金水土不服回流西甲嘅拉樸迪（Aymeric Laporte，畢爾包中堅）。咁當然，西班牙若然能改善防守死球與及互射十二碼失準等老問題，始終仍會被視為熱門之一。

分組賽賽程（香港時間）
16/06/2026 (00:00) 西班牙 vs 佛得角
22/06/2026 (00:00) 西班牙 vs 沙特阿拉伯
27/06/2026 (08:00) 烏拉圭 vs 西班牙

---

入選名單:

名單更新日期:04/06/2026