31/05/2026 巴黎聖日耳門 vs 阿仙奴（歐聯決賽）

足球資訊 | 歐洲聯賽冠軍盃(2025/26) | 發布日期: 26/05/2026

比賽日期	主隊	客隊	主勝機率	客勝機率
2026-05-31 00:00	巴黎聖日耳門	阿仙奴	53.5 %	46.5 %

主勝機率	客勝機率
53.5%	46.5%

排名: 法甲(1) vs 英超(1)

直播資訊: Now 638, NowE, beIN Sports

自從皇家馬德里喺2016至2018年完成歐聯三連霸後，隨後所有球隊都未有再試過連勝，就連再入決賽都係要嚟到今季嘅巴黎聖日耳門（PSG）先可以再嚐滋味（去年決賽5:0大勝國際米蘭）。另一方面阿仙奴終於打破24年來嘅聯賽冠軍荒，但2006年歐聯決賽不敵巴塞隆拿嘅陰影揮之不去，當時阿仙奴嘅星級前鋒亨利如今喺電視上公開向後輩布卡約沙卡（Bukayo Saka）送上祝福，希望呢這位年輕核心可以幫自己修補遺憾。論牌面PSG會稍勝一籌，阿仙奴靠嘅則係今期煉成嘅沉著不屈。

當四強另一邊殺到天昏地暗（PSG兩回合合計6:5淘汰拜仁），阿仙奴面對防守專家馬德里體育會，主客各入一球就剛好夠用（兩回合合計贏2:1），今季新加盟嘅瑞典前鋒約基利斯（Viktor Gyokeres）重拾射門觸覺先拔頭籌之外，次回合一箭定江山嘅布卡約沙卡亦都見證住主力回歸對阿仙奴帶嚟嘅重大upgrade：沙卡喺四月傷出期間，阿仙奴三線比賽只錄得一勝一和三負，其中兩場英超輸晒之餘，就連英格蘭友賽日本都搞到主場輸波。但當沙卡四月尾復出，呢支「兵工廠」即喺英超締造四連勝、提前一週封王，因此喺煞科日面對同樣闖入歐洲賽事決賽嘅水晶宮，沙卡亦都可以連同迪勤懷斯（Declan Rice）、沙列巴（William Saliba）三線好幾位主將休息，喺見證英超加冕之後帶住興奮嘅心情出發前往決賽所在地布達佩斯。

阿仙奴今季喺歐聯賽場成績亮麗，踢出14場全數不敗（11勝3和）之餘更只失六球，但當要跨季數上去，就會見到紀錄停留咗喺上季出局一刻，當時就係喺四強俾巴黎雙殺（合計1:3）。PSG四強首回合同拜仁踢到飛砂劈石僅拉開一球差距，勢估唔到次回合作客即刻可以調整踢出高效防守，喺慕尼黑守和1:1夠數出線，可見教練安歷基以至一眾球員嘅適應能力。及後PSG亦有意無意俾人拍到佢哋苦練防守角球嘅片段，表明對於阿仙奴今季經常用嚟食糊嘅角球戰術已經有一定免疫力。球員近況方面亦比前一排稍有好轉，四強首回合只係剛復出嘅中場法比安路爾斯（Fabian Ruiz）已算係回復狀態，中鋒迪比利（Ousmane Dembele）一直糾纏不清嘅腳傷亦有斷尾跡象，唯獨係四強首回合整傷大腿嘅右閘夏基美（Achraf Hakimi）睇嚟將趕唔及完全康復，至少唔洗預佢可以正選登場，中場薩伊安美爾好大機會要再一次移後撐住右後防位置。

此外亦應要留意，巴黎聖日耳門聯賽收咧係比阿仙奴早咗足足成個禮拜，換句話講PSG喺歐聯決賽前有足足13日冇踢正賽，期間只係安排咗隊內進行一啲對抗賽，決賽時嘅競賽狀態會否受到影響，就真係要打咗至知。

分類:

足球資訊

31/05/2026 巴黎聖日耳門 vs 阿仙奴（歐聯決賽）

分類:

標籤:

關於我們:

快速連結:

聯絡我們: