歐聯精選賽前分析 (29/01/2026)

足球資訊 | 歐洲聯賽冠軍盃(2025/26) | 發布日期: 27/01/2026

直播資訊: Now, NowE, beIN Sports

29/01/2025 04:00 巴黎聖日耳門(法甲1) vs 紐卡素(英超9)

PSG、紐卡素以至另外六隊都係13分同分，稍有差池即有機會出現尾場排位大兜亂。紐卡素今季作客表現不濟自然睇低一線，上週末英超主場亦都淨吞維拉兩蛋兼有中場Joelinton因傷中途離場，另一中場Guimaraes亦喺休假完後有輕傷有待觀察。

29/01/2025 04:00 多蒙特(德甲2) vs 國際米蘭(意甲1)

國際米蘭附加賽資格已經到手，雙方仍可以嘗試爭勝爭取直接出線。國米星期五稍作輪換輕取比薩6:2，歐聯主場二勝一和嘅多蒙特喺週六德甲亦都收起Adeyemi、Brandt兩位進攻要員，雙方留力歐聯拍搏殺姿態明顯。

29/01/2025 04:00 利華古遜(德甲6) vs 維拉利爾(西甲4)

維拉利爾西甲、歐聯已連輸三場，星期六主場出全力都淨吞皇家馬德里兩蛋，歐聯暫列尾二鐵定出局嘅佢哋未必會再全力應戰。利華古遜仍有出局危機，歐聯聯賽階段更係主場未勝極為尷尬，今場爭勝欲望不用置疑，障礙在於傷兵較多或會力不從心。

29/01/2025 04:00 法蘭克福(德甲8) vs 熱刺(英超14)

仍由看守教練帶領嘅法蘭克福週末德甲後防大執但依然出醜，歐聯尾場想用一場勝仗謝幕難度唔低。傷兵滿營嘅熱刺喺聯賽只能賽和尾二嘅般尼，主帥Frank再成為球迷攻擊對象，詭異在熱刺歐聯主場全數clean sheet贏波豪取八分，想喺大量傷兵、新援未可注冊嘅劣勢下保住直接出線資格，不妨考慮同呢隊後防穿窿嘅法蘭克福對攻。

29/01/2025 04:00 拿玻里(意甲4) vs 車路士(英超5)

傷兵滿營嘅拿玻里要爬升多一位先至有得打附加賽爭入十六強，但觀乎上週先和哥本哈根再淨吞祖雲達斯三蛋嘅表現，今場返回主場但要鬥車難度仍係好高。車仔攻中Palmer因傷再度錯過上星期日作客水晶宮嘅聯賽，目標改喺今場復出。

29/01/2025 04:00 摩納哥(法甲10) vs 祖雲達斯(意甲5)

祖雲達斯已有附加賽資格在手，仍可爭取直接出線。摩納哥法甲踢到一鑊粥但歐聯賽場表現合格，最大挑戰仍在於傷兵一大堆，例如中堅Dier復出即再傷，右閘Teze嚟緊又要移入中路頂上。

分類:

足球資訊

歐聯精選賽前分析 (29/01/2026)

分類:

標籤:

關於我們:

快速連結:

聯絡我們: