歐聯休息咗成個幾月，今個禮拜重新開波展開聯賽階段第八週嘅賽事，今個禮拜有意甲一哥國際米蘭硬撼英超一哥阿仙奴。兩隊上季首次玩新制歐聯就已經喺聯賽階段碰過頭，今季暫時亦都同樣處於頭八名嘅直接出線位置，為求盡早確定出線，今場定必搏盡。

國際米蘭喺第六週主場輸俾臨時收起沙拿變陣嘅利物浦，番到意甲隨即回復強勢，打後七場聯賽贏足六場，僅係同爭標勁敵之一嘅拿玻里打成平手，亦一直穩坐榜首位置。主帥捷禾嘅執教資歷算係淺，但佢亦都善於調整陣容令球隊保持競爭力，甚至連意大利國腳法迪斯（Davide Frattesi）都話可以價啱就放，可見佢對國米現時條中場線幾咁放心。

不過國米今場要面對嘅係已經雄躆英超榜首足足三個月嘅阿仙奴，壓力只會有多冇少。阿仙奴今季英超、歐聯同步發威，歐聯六輪過後全勝豪取18分，期間更要令德甲一哥拜仁慕尼黑不敗紀錄中止。呢支面面俱圓嘅廠隊要直接出線本已係問題不大，嚟緊只爭在要唔要全力提前一圈確定出線之餘兼夾拎埋個首名爭取更大筆嘅獎金、甚至係以全勝身份完成呢個第二年行新制嘅聯賽階段。

與國米同期相比，阿仙奴喺英超嘅七場聯賽都贏到五場，僅係賽和表現反覆嘅上屆冠軍利物浦，與及出發前與諾定咸森林同樣以0:0賽和：呢場波教練阿迪達將布卡約沙卡（Bukayo Saka）先列後備，半場又提前收起另一翼鋒馬天尼利（Gabriel Martinelli），明顯為咗今場作客國米保留實力。而就算今季新收購嘅基奧基尼斯（Viktor Gyokeres）繼續夢遊，但隨著夏維斯（Kai Havertz）傷癒待命、再加埋早已習慣充當前鋒得分嘅馬連奴（Mikel Merino）亦都係輪休只踢半場，相比之下國米可以收起休息嘅就只有二號前鋒馬古斯杜林（Marcus Thuram），佢哋想重溫上季贏1:0嘅美夢就要多加努力喇。