歐聯分組賽第五輪上演英超、德甲甚至係歐聯嘅一哥大戰：阿仙奴、拜仁慕尼黑無論實力、近況上嘅比拼都係今輪嘅焦點。兩隊目前同樣以四戰全勝、得失球差同係+11並列榜首，而阿仙奴同拜仁呢兩季分別從水晶宮引入咗進攻核心艾斯（Eberechi Eze）與及奧利斯（Michael Olise），則令比賽增添咗更多話題性。

阿仙奴儘管傷兵滿營，但令人意外係進攻火力依然強橫，今季新加盟嘅攻中艾斯近況火熱，剛剛就喺北倫敦打比對熱刺大演帽子戲法。艾斯聯同兩翼布卡約沙卡（Bukayo Saka）、杜沙特（Leandro Trossard）組成嘅攻擊線，配合靈活走位嘅馬連奴（Mikel Merino）繼續充當中鋒，令阿仙奴得以維持入波源源不絕。中場方面，隊長奧迪哥特因傷缺陣雖然影響組織力，但係蘇比文迪（Martin Zubimendi）與及迪勤懷斯（Declan Rice）仍keep得住中場嘅平衡，以致防守方面就算再失去埋巴西中堅加比爾馬加希斯都未見有嚴重走樣，歐聯四輪未失一球固然係堅，就算拉勻睇晒所有18場正賽亦只係失咗6球，趁機擔正嘅厄瓜多爾中堅軒卡比又有豐富德甲經驗，今場要打拜仁自然更有信心。

作客嘅拜仁開季至今正賽17勝1和保持不敗，看似同樣強勢，不過都已經見到佢哋並唔係咁無堅不摧：例如近六場只係喺面對少踢一人嘅慕遜加柏，與及留力歐聯嘅利華古遜時先能夠保持清白之身，其餘四場均未能clean sheet。上場歐聯作客奮力擊敗巴黎聖日耳門報番世冠一箭之仇，但代價卻係翼鋒迪亞斯領紅竟換來三場停賽，要知道迪亞斯今季先至從利物浦轉投拜仁，由佢以至中鋒哈利卡尼（Harry Kane）所擁有嘅英超經驗本來係至關重要。而預計代替迪亞斯嘅，則係人氣急升嘅青訓產品卡爾（Lennart Karl），呢位矮腳虎善於盤扭，下下靚波入球，但不得不排除年僅17歲嘅佢表現仍係會較難捉路，正如較早前可以喺布魯日身上取得首個歐聯入球，到下一場作客PSG嘅生死戰就已經變番座上客。拜仁要昂然離開酋長球場，今次要面對嘅變數同挑戰會比上場作客PSG嚟得更多。（歐聯X圖片）

 

預計兩隊正選陣容：

【阿仙奴】
Raya – Timber, Saliba, Hincapie, Calafiori - Eze, Zubimendi, Rice - Saka, Merino, Trossard

【拜仁慕尼黑】
Neuer - Stanisic, Upamecano, Tah, Laimer - Kimmich, Pavlovic - Karl, Olise, Gnabry - Kane

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。