24/11/2025 阿仙奴 vs 熱刺

足球資訊 | 英格蘭超級足球聯賽(2025/26) | 發布日期: 22/11/2025

比賽日期	主隊	客隊	主勝機率	和局機率	客勝機率
2025-11-24 00:30	阿仙奴	熱刺	54.5 %	25.0 %	20.4 %

主勝機率	和局機率	客勝機率
54.5%	25.0%	20.4%

排名: 英超(1) vs 英超(5)

阿仙奴今個星期日主場迎戰熱刺，北倫敦打吡作為佢地黎緊五場硬仗首場，全取3分可能成為爭冠關鍵。阿仙奴目前以26分排榜首，近五場聯賽保持不敗(4勝1和)。對手熱刺今季較起伏不定，目前18分排第五，近五場聯賽2勝3負，穩定性令人擔憂。北倫敦打吡除咗充滿火藥味，呢場亦係「死球打吡」。阿仙奴係今季英超死球入波最多嘅一隊，將會面對死球專家前賓福特領隊法蘭。法蘭為球隊帶嚟嘅唔止係死球入波嘅板斧，仲令熱刺成為聯賽死球失波最少嘅球隊。角球入波阿仙奴係英超最多，熱刺係第二，呢場可以話係高手過招。

今年最後一個國際賽期完結，唔少國家隊為咗明年世界盃一席激戰連場，出現連番絕殺嘅場面。球員落場搏到盡，難免有人為國捐軀，損兵折將影響球會喺聯賽嘅部署。

阿仙奴喺國際賽期前曾有八場零失球紀錄，但最近作客新特蘭就失咗兩球。國際賽期後防線又多添十字軍，主力加比爾馬加希斯(Gabriel Magalhães)代表巴西出戰時右大腿肌肉受傷，預計至少養傷一個月，卡拉科利(Riccardo Calafiori)因傷未能代表意大利出戰，添巴(Jurrien Timber)為荷蘭上陣時亦整傷膝蓋。

熱刺方面，除咗原有嘅長期傷兵之外，貝加華(Lucas Bergvall)上兩場聯賽因腦震盪要休息，預計可以復出，中場柏沙亞(Pape Matar Sarr)代表塞內加爾時撞傷，領隊法蘭表示佢已經傷癒。高路姆亞尼 (Randal Kolo Muani)對曼聯時顎骨撕裂，復操後仍要帶特製面罩，上陣成疑。喺蘇蘭基(Dominic Solanke)復出之前，鋒線要依靠列查利臣(Richarlison)。中前場傷兵唔少，創造力不足，對車路士一戰，熱刺創下今季英超預計入球率最低嘅紀錄。

阿仙奴喺主場通常比較進取，採取高位壓迫同兩邊側擊嘅踢法。失去今季兩入球三助攻嘅加比爾，攻守兩端都受影響。自上季開始，加比爾缺席嘅賽事，只有40%勝率，失波亦多43%。熱刺則會用快速反擊，利用列查利臣嘅衝擊力同體能製造威脅。

兩隊都受傷患影響下，阿仙奴嘅板凳深度就令佢哋有優勢。齋睇往績，近六場北倫敦打吡，阿仙奴贏五場和一場，今季主場亦都係超強勢，各項賽事八場只係失左一球。熱刺雖然今季聯賽作客未嘗一敗，係作客得分同入球最多，失球最少嘅一隊，今場作客死敵亦困難重重。

分類:

足球資訊

24/11/2025 阿仙奴 vs 熱刺

分類:

標籤:

關於我們:

快速連結:

聯絡我們: