英超精選賽前分析(11/04/2026-14/04/2026)

足球資訊 | 英格蘭超級足球聯賽(2025/26) | 發布日期: 10/04/2026

11/04/2026 03:00 韋斯咸(英超18) vs 狼隊(英超20)

主勝: 47.7% 客勝: 23.8%

韋斯咸多位主力傷過，包括中堅Todibo、左翼Summerville與及前鋒Wilson，但三人都仍有望今場復出，如是者將有助維持面對狼隊嘅優勢。

11/04/2026 19:30 阿仙奴(英超1) vs 般尼茅夫(英超13)

主勝: 60.5% 客勝: 18.1%

阿仙奴提前召回多位去咗國家隊報到嘅主力球員，一度惹嚟非議，更尷尬係隨即嚟足總盃意外俾修咸頓被淘汰，但及後歐聯又可以作客力克士砵亭。與期寄望幼齒Dowman多啲落場刺激下一眾大佬，倒不如多啲留意歐聯表現成熟嘅前鋒Havertz與及門將Raya。

11/04/2026 22:00 賓福特(英超7) vs 愛華頓(英超8)

主勝: 43.0% 客勝: 33.3%

賓福特與愛華頓目前分別排喺第7及第8位，係競爭歐戰資格嘅直接對手。賓福特近期表現回軟，國際賽檔期前喺聯賽已係連和三場，足總盃更要俾韋斯咸淘汰。愛華頓自第20週主場輸夠2:4俾賓福特後，整體表現同主隊不相伯仲，長假前主勝車路士就更加係經典。

11/04/2026 22:00 般尼(英超19) vs 白禮頓(英超10)

主勝: 17.3% 客勝: 59.9%

白禮頓喺國際賽檔期前逐漸回勇，國際賽期間翼鋒三笘薰繼續神勇，更喺溫布萊對英格蘭射入靚波，番到英超則要先消化隊長中堅Dunk停賽兩場（累積10張黃牌）為後場帶嚟嘅挑戰。

12/04/2026 00:30 利物浦(英超5) vs 富咸(英超9)

主勝: 70.2% 客勝: 12.5%

近況低迷嘅利物浦星期三歐聯作客PSG，過度著意防守排出罕見嘅3-5-2顯得顧此失彼，但總算見到中鋒Isak今年首度落場，嚟緊番到聯賽又睇下三個今季新簽嘅Isak、Ekitike、Wirtz有冇得同場合體。

12/04/2026 21:00 水晶宮(英超14) vs 紐卡素(英超12)

主勝: 35.3% 客勝: 38.2%

紐卡素長假期前先後喺歐聯、英超輸波，正好趁休假整頓，期間亦有前鋒Elanga協助瑞典淘汰波蘭出線世界盃決賽週。水晶宮則喺星期四踢多一場歐協聯，精銳盡出之下先贏費倫天拿一場，復出冇耐嘅前鋒Mateta取得入球。

12/04/2026 21:00 諾定咸森林(英超16) vs 阿士東維拉(英超4)

主勝: 32.1% 客勝: 32.1%

對賽雙方都先喺星期四嘅歐霸八強預熱。森林只能靠對手波圖自擺老烏逼和，次回合顧慮會較多，唯一喜訊係傷出近半年嘅前鋒Wood終於復出。維拉狀態仍未回復最佳但仍可以喺客場收服博洛尼亞，前鋒Watkins梅二度但同時亦踢足90分鐘。

12/04/2026 21:00 新特蘭(英超11) vs 熱刺(英超17)

主勝: 42.9% 客勝: 30.1%

今季不斷靠主場數糊嘅新特蘭呢一刻比熱刺多出13分，但遇上主場三連敗嘅兵河時期，俾到熱刺唔少幻想空間。今場將會係熱刺本季第三任教練De Zerbi首度登場，前鋒Tel、中場Bentancur及P.Sarr能否如傳聞所講一齊復出將好影響賽情走向。

14/04/2026 03:00 曼聯(英超3) vs 列斯聯(英超15)

主勝: 62.7% 客勝: 16.3%

四大皆空嘅曼聯剛結束悠長嘅休戰期，需留意球員臨場狀態，亦要注意左路嘅Dorgu估計下場先至復出，與及新續約嘅中堅Maguire今場停賽。服刑完畢嘅列斯聯後衛Gudmundsson應可處理好傷患復出，但中後場主將Stach、Rodon都受咗傷，陣容有欠完整。