16/03/2026 利物浦 vs 熱刺

足球資訊 | 英格蘭超級足球聯賽(2025/26) | 發布日期: 14/03/2026

比賽日期	主隊	客隊	主勝機率	和局機率	客勝機率
2026-03-16 00:30	利物浦	熱刺	70.2 %	16.2 %	13.5 %

主勝機率	和局機率	客勝機率
70.2%	16.2%	13.5%

排名: 英超(6) vs 英超(16)

利物浦對熱刺傳統big 6嘅大戰，會唔會再喺來季出現，暫時仲係未知數。熱刺換新帥救火，結果四戰全敗、攻守更差、新帥效應無，火勢更一發不可收拾。Opta根據餘下賽程預測最後聯賽榜嘅排名，般尼狼隊墊底，有超過99%機會降班，熱刺就只有16.1%。數據上幾樂觀，但睇返熱刺嘅近況，近10場聯賽只係攞咗3分，得失球差-11，英超球隊中勢頭最差。對手利物浦近況反覆，上場聯賽輸比榜尾狼隊全失三分士氣受挫，三日後再喺同一地點足總盃碰頭，就一吐烏氣淘汰對手晉級。兩隊周中歐聯都輸波，帶住次回合必勝嘅壓力，一場聯賽勝仗，有望為球隊幾日後嘅歐聯生死戰帶來動力。

被管理層寄予厚望為球隊止血嘅杜陀上任後，三場倫敦打吡全敗，歐聯更經歷一場災難。作客馬體會，後備門將堅斯基(Antonín Kinský)跣腳加撻Q送兩個大禮，後防又腳軟，結果15分鐘已經輸到0:3，杜陀忍唔住立即換入正選門將維卡里奧(Guglielmo Vicario)。通常要護級嘅球隊，波運都較差，連杜陀都三番四次公開表示所有嘢都唔順，執教生涯未見過咁嘅情況。事實上熱刺球員質素、心態、傷兵、管理層方向等都同佢格格不入。佢堅持要喺人腳未能配合時踢三中堅，結果防守企位混亂，邊路被爆穿。為咗搵出短期解決方案，喺歐聯作客時輪換龍門，效果唔好又即刻換走，完全冇理會球員感受同球隊士氣，難怪雲迪芬(Micky van de Ven)亦表示呢段時間精神飽受困擾。如果影響球員落場心態，要扭轉球隊劣勢就更加困難，而熱刺嘅運勢，沒有最差只有更差。呢場除咗雲迪芬停賽之外，羅美路(Cristian Romero)同祖奧柏連拿(João Palhinha)亦因為對馬體會時頭撼頭，呢場需要按球員頭部受傷嘅規例休戰，比素馬(Yves Bissouma)有傷，干拿加拉加(Conor Gallagher)發燒，未必趕及上陣。

史諾嘅帥位，戰績不穩定下暫時保得住。足總盃過關之後，今季第二次作客加拉塔沙雷地獄球場，同歐聯聯賽階段嗰場一樣，利物浦整場製造唔少機會，但一個防守角球失誤就導致首回合落後。今場亦係利物浦今季攻不銳守不穩嘅寫照。剛復出嘅費林邦（Jeremie Frimpong)同穫斯(Florian Wirtz)都未能踢出水準，干拿迪(Ibrahima Konaté)甩漏甚多。今季已經失去以往爆發力嘅沙拿(Mohamed Salah)，侵略性已經大大降低。踢咗大半季，史諾似乎仍未諗到最佳人腳配置，於是仍然繼續踢海鮮波，輸完又贏返，繼續保就業到季尾。周中操練時拉傷嘅艾利臣(Alisson)，史諾透露未肯定能趕及上陣，但基艾沙(Federico Chiesa)已經病癒，隨時候命。

八日內三次作客嘅利物浦，返主場迎戰傷疲盡出人腳不整嘅熱刺。據多個媒體報道，杜陀嘅消防員生涯，最快會喺對利物浦之後終結。殘陣加上士氣低迷，熱刺將難擋晏飛路嘅主場氣勢。

分類:

足球資訊

16/03/2026 利物浦 vs 熱刺

分類:

標籤:

關於我們:

快速連結:

聯絡我們: