13/12/2025 利物浦 vs 白禮頓

足球資訊 | 英格蘭超級足球聯賽(2025/26) | 發布日期: 13/12/2025

比賽日期	主隊	客隊	主勝機率	和局機率	客勝機率
2025-12-13 23:00	利物浦	白禮頓	56.4 %	20.4 %	23.2 %

主勝機率	和局機率	客勝機率
56.4%	20.4%	23.2%

排名: 英超(10) vs 英超(8)

上星期六利物浦作客列斯聯臨完場前被逼和，賽後蘇保斯拿爾(Dominik Szoboszlai)提到球員會努力解決更衣室嘅問題，轉頭連續三場被貶後備嘅沙拿(Mohamed Salah)就喺訪問中大爆發，指有人想佢離隊，自己做咗輸波嘅代罪羔羊，同史諾關係轉差。瞬間將利物浦今季嘅內部問題暴露喺公眾面前，足球評述員、名宿都議論紛紛。其後沙拿被剔岀歐聯對戰國際米蘭名單，喺社交媒體分享自己喺訓練場斯人獨操練嘅相。沙拿話對白禮頓，好可能係佢代表利物浦嘅最後一場賽事。據傳媒報道，賽前一日史諾同沙拿會面後，確定沙拿入選對白禮頓大軍，只係未知有冇機會上陣。叫做先將件事降溫，再用非洲國家盃做冷靜期去處理大家嘅分歧。對手今季穩定地不穩定嘅白禮頓，今個球季攻守比上季有進步，防守雖然仍未算穩健，但仍有機會趁對手內亂搶分。

利物浦到底係要Mo Salah 定「冇沙拿」？賽果決定一切，連輸三場後，沙拿失去正選位置，球隊所有賽事四場不敗(贏兩場和兩場)。星期二嘅歐聯，帥位危危乎嘅史諾再次證明冇沙拿冇問題。事實上沙拿今季狀態欠佳，射門失準並多次成為攻勢終結者，加上同加普(Cody Gakpo)喺左右兩邊都唔係傳統翼鋒，中鋒伊蕯(Alexander Isak)供應緊絀，喺球隊落後之時，史諾往往擺大個頭，前鋒各自搵食，要入波就更困難。由於加普要養傷幾個星期，伊蕯周中輕傷上陣成疑，沙拿即將出發滙合國家隊，預計呢場嘅進攻重心將會再落喺獲斯(Florian Wirtz)身上。有球權嘅獲斯對韋斯咸時變成中前場自由人，表現光芒四射，對國際米蘭佢換入後亦大大提升進攻動力。干拿巴特利(Conor Bradley)傷癒復出，亦加強咗右邊嘅側擊能力。進攻套路上，沙拿唔再係進攻重心下係有改善，但防守上今季利物浦就經常犯錯，聯賽得失球差現時係零。利物浦今季嘅最大弱點，係經常被對手劏穿中場反擊得手，快速反擊亦係白禮頓嘅強項。

白禮頓攻力唔錯，射手老將韋碧克(Danny Welbeck)今季各項賽事已經入咗7球，佢代表白禮頓對紅軍亦有2個入球。領隊靴士拿形容佢有如越放得耐就越純嘅紅酒。迪亞高高美斯(Diego Gómez)亦有7球進帳，兩人並列球隊首席射手。上星期本來主場贏韋斯咸就可以升上前四，點知球隊啞火，臨完場先有四次中龍，最終憑前鋒凱達(Georginio Rutter)補時階段嘅入波，打和1:1。白禮頓擅長用傳球打穿對手防線，幫球隊快速由守轉攻嘅中堅雲希格 (Jan Paul van Hecke)，今季喺英超完成咗 217 次突破防線嘅傳球，係全聯賽最多嘅球員。隊中速度同個人突破能力最強嘅三笘薫，養傷兩個月後呢場終於復出。上季季尾主場對利物浦，白禮頓喺落後下靠佢後備入替，喺左路策動攻勢同入球，令球隊反勝3:2。

白禮頓後勁十足，有七成嘅入球喺下半場射入，往往能夠喺比賽後期改變戰局，但作客戰績較弱(主場四勝，作客兩勝)。現時兩隊同分，白禮頓以得失球差佔優排名較高，但論近況仍然係利物浦較佳，雖然球隊內部仍有未解決嘅問題，周中歐聯嘅勝仗，將會係球隊嘅強心針。

分類:

足球資訊

13/12/2025 利物浦 vs 白禮頓

分類:

標籤:

關於我們:

快速連結:

聯絡我們: