英超精選賽前分析(24/05/2026)

足球資訊 | 英格蘭超級足球聯賽(2025/26) | 發布日期: 21/05/2026

直播資訊: Now TV, NowE

24/052026 23:00 白禮頓(英超7) vs 曼聯(英超3)
主勝: 45.3% 客勝: 27.9%

白禮頓上輪聯賽臨尾補時先至俾列斯聯一球收死，但第六名可以參加歐聯外圍賽，全力爭勝動力仍在，而其中一個障礙則在於右閘Wieffer因傷已連續缺陣兩場，今場能否復出仍成疑。曼聯則已經lock實第三與及歐聯席位，今場作客戰意或存疑。

24/052026 23:00 富咸(英超13) vs 紐卡素(英超11)
主勝: 43.4% 客勝: 30.4%

富咸上週作客僅和狼隊可謂自斷後路，歐協聯嘅最後機會已係名存實亡，球會高層亦已著手下季planning。紐卡素做程咬金將韋斯咸推往深淵，今場如果做到兩連勝或者四場不敗都只係挽回面子嘅些少bonus。

24/052026 23:00 利物浦(英超5) vs 賓福特(英超9)
主勝: 68.7% 客勝: 12.9%

利物浦上輪作客2:4不敵阿士東維拉，全季失球直上52個，創下球會進入英超38場時代以來嘅紀錄，防守死球方面再努力都已失到19球，最後一輪爭上第四動力有限。賓福特上場主場悶和水晶宮，排名暫跌出歐賽區之外，嚟緊寄望車路士失分之餘仍要靠自己全力爭勝。

24/052026 23:00 曼城(英超2) vs 阿士東維拉(英超4)

（請留意網站詳細分析）

24/052026 23:00 諾定咸森林(英超16) vs 般尼茅夫(英超6)
主勝: 38.5% 客勝: 31.4%

般尼茅夫星期二打場好波阻埋曼城贏冠軍，下季已至少打到歐霸，但考慮到第六名有機會打歐聯外圍賽，排第七嘅白禮頓預計會出盡力打曼聯嘗試追上，即係少咗兩日休息時間嘅般尼茅夫為安全計仍要出全力作客森林。

24/052026 23:00 新特蘭(英超10) vs 車路士(英超8)
主勝: 26.5% 客勝: 48.5%

兩隊仍有目標去追：新特蘭仍可以嘗試闖入歐賽區，但今場必須先擊敗車路士同時賓福特作客利記失分，新特蘭自己近六場主場只做到一勝一和，稍為輸蝕即管盡做。車路士依然飄忽難捉路，攻中Palmer已經連續七場聯賽冇任何入球助攻，近緊要靠E. Fernandez撐住，而上場贏熱刺重回第八，贏波就尚有機會「重返」歐霸，而唔洗「初嘗」歐協聯稍為保住面子。

24/052026 23:00 熱刺(英超17) vs 愛華頓(英超12)
主勝: 43.5% 客勝: 35.8%

熱刺首循環作客贏夠3:0，今場護級大戰有心理支持，另一方面鑑於護級對手韋斯咸取分機會唔細，熱刺今場需要以全取三分作目標。主帥De Zerbi比賽前強調呢場波唔單止用嚟護級，更係要用嚟保住熱刺嘅尊嚴。客隊愛華頓上場主場1:3敗給新特蘭，防線連場鬆散，已經連續六仗不勝，期間狂失14球，歐賽之夢已粉碎咗大半。

24/052026 23:00 韋斯咸(英超18) vs 列斯聯(英超14)
主勝: 50.9% 客勝: 24.0%

首循環列斯聯主場2:1小勝韋斯咸，雙方實力接近，嚟到今場韋斯咸主場護級勢將大規模反撲。韋斯咸上輪作客紐卡素不斷變陣救急仍要全失三分，今場必須全取三分並且寄望熱刺失分。護級壓力已去番晒自己呢邊。列斯聯上仗補時階段攻入白禮頓致勝一球，近三場錄得兩勝一負，可惜係防中Stach再次傷出，如今護級任務已達怕且只會順勢而為。

分類:

足球資訊

英超精選賽前分析(24/05/2026)

分類:

標籤:

關於我們:

快速連結:

聯絡我們: