英超開季大家可能會俾利物浦等多隊嘅大手收購嚇親，查實又唔係隊隊都有參與呢場軍備競賽嘅，就例如第一週其中兩隊代表富咸、白禮頓剛好就碰上，亦好邪地只能賽和1:1。富咸陣容基本沿用上季主力或許唔係佢哋想咁，只係佢哋喺轉會市場上唔多順手，不論係阿仙奴嘅尼爾遜（Reiss Nelson）抑或係薩克達嘅Kevin，富咸為左翼伊禾比（Alex Iwobi，圖左）尋找支援呢個項目不斷觸礁，教練馬高施華亦難掩失望之情。暫時可以令球隊稍加變化嘅位，就係俾陣中得18歲嘅小將約舒亞京治（Josh King）擔正。京治呢場波正選上陣踢到77分鐘，馬高施華喺66分鐘開始變陣追分都未收起佢，可見嚟緊將會係馬高施華嘅栽培對象。（最新傳聞：富咸、阿記已就借用尼爾遜重啟談判）

富咸今場嘅對手曼聯喺轉會市場動作頻繁，積極引入多位高價新援，教練艾摩廉將繼續維護由自己改寫球隊命運嘅控制權，同時嘗試以3-4-2-1陣型嚟配合新到嘅進攻球員例如根夏（Matheus Cunha）、麥比奧莫（Bryan Mbeumo）嘅特點，務求加強中場控制同攻擊層次。雖然首輪主場以0:1不敵阿仙奴，可見球隊仍處於磨合階段，但外界評論傾向正面，尤其係當新援喺前場嘅支點作用逐漸顯現，連帶中後場嘅防守組織亦會開始有番起色，不過喺面對高強度逼搶時，球隊防線仍需更穩定嘅表現。現時曼聯陣容依然存在不確定因素，例如加拿曹（Alejandro Garnacho，圖右）等年輕球員嘅去向未明（傳聞加拿曹本人係想「上車」）、上季打起嘅防中明奈（Kobbie Mainoo）又似係已經失勢，部分老將嘅狀態波動同新援嘅磨合問題，都係球隊需要盡快解決嘅挑戰。回顧上季，雖然曼聯狀態唔算理想，但仍能主、客同以1:0雙殺富咸，顯示仍有一定優勢。