24/05/2026 曼城 vs 阿士東維拉

足球資訊 | 英格蘭超級足球聯賽(2025/26) | 發布日期: 23/05/2026

比賽日期	主隊	客隊	主勝機率	和局機率	客勝機率
2026-05-24 23:00	曼城	阿士東維拉	76.6 %	14.9 %	8.5 %

主勝機率	和局機率	客勝機率
76.6%	14.9%	8.5%

排名: 英超(2) vs 英超(4)

阿仙奴力戰般尼之際，網上突然爆出震撼消息：執教曼城十年、奪盃無數嘅哥迪奧拿，對維拉將會係佢喺曼城嘅告別戰。離隊後佢會成為球會集團嘅全球大使，提供技術意見同參與合作項目。長年累月承受作為英超頂級球會領隊嘅壓力，同高普一樣，哥帥表示已經精力耗盡要休息吓。同球會仲有一年合約，雖然傳聞已久，消息都嚟得好突然，有人聯想到同即將判決嘅115條財政公平條例案件有關。主帥離任，意味住曼城皇朝踏入新階段，傳聞接班人係哥帥欽點嘅前副手兼前車路士領隊馬列斯卡。哥帥退位嘅消息未知有冇影響球員表現，曼城捧完足總盃後似乎無以為繼，只能逼和般尼茅夫，亦即時將聯賽冠軍拱手相讓俾阿仙奴。另一邊廂，維拉第二日以壓倒性姿態捧走「艾馬利歐霸盃」。坊間仲笑言，要贏呢項盃賽，球隊名必須含一組神秘英文字母VILLA (Villarreal, Sevilla, Aston Villa）。

哥迪奧拿為曼城帶來20個主要錦標，包括6個英超，1個歐聯，打造出近年英超最具統治力嘅皇朝。佢塑造一套曼城嘅獨有風格，唔單止將一衆球員提升成世界級，亦啟蒙咗阿迪達、甘賓尼、安歷基、馬列斯卡等新一代名帥。曼城由豪門變成長期爭冠嘅超級球隊，佢嘅傳奇地位無可取代。

曼城周中對般尼茅夫，捧走雙盃後球迷原本期望再取三分，將爭冠形勢推到沸點。但球員落場明顯體能同戰意都不及對手，跟唔上般尼茅夫嘅節奏與高位壓迫。幾乎用盡可用人腳，最終補時靠夏蘭特(Erling Haaland)追成 1:1，亦意味哥帥連續兩年失落聯賽冠軍。雖然煞科戰已無實質目標，呢場哥帥告別戰，球員理應會全力以赴踢場好波，送別呢位傳奇教頭。

維拉上輪聯賽派出主力強攻，主場大勝利物浦，提前鎖定下季歐聯資格，之後專心準備歐霸決賽。面對弗賴堡時，球隊鬥志十足，以3:0輕鬆奪冠，氣勢如虹。而摩根羅渣士(Morgan Rogers)亦憑出色表現成為今季歐霸最佳球員。幾日後就要踢煞科戰，維拉已手握錦標，聯賽排名對佢哋影響唔大。不過，第六位嘅般尼茅夫就期望維拉輸波，只要利物浦同時贏波升上第四，第六名就有機會得到歐聯一席，令呢場比賽嘅外圍形勢更添變數。

曼城主場迎戰維拉，焦點係哥迪奧拿「告別戰」。曼城奪雙盃後狀態稍為回落，但主場依然具優勢；維拉剛奪歐霸，又已穩奪歐聯資格，預計兩隊都有機會用逼選球員上陣，主場作賽加上後備嘅質素，曼城將會佔優。

分類:

足球資訊

24/05/2026 曼城 vs 阿士東維拉

分類:

標籤:

關於我們:

快速連結:

聯絡我們: