英超精選賽前分析(04/03/2026-06/03/2026)

足球資訊 | 德國甲組足球聯賽(2025/26) | 發布日期: 02/03/2026

04/03/2026 03:30 般尼茅夫(英超10) vs 賓福特(英超7)

主勝: 34.4% 客勝: 40.9%

般尼茅夫喺上週對新特蘭幸好有球冇被判十二碼，得以賽和1:1，而計晒2026年開始至今般尼茅夫喺英超只係輸過俾阿仙奴（四勝四和一負），亦已經連續五場失球不多於一球。至於同期贏多一場嘅賓福特上週則只能以2:1險勝般尼，全場表現未算特別突出。

04/03/2026 03:30 愛華頓(英超8) vs 般尼(英超19)

主勝: 44.6% 客勝: 29.1%

愛華頓上仗作客3:2擊敗賽期較密嘅紐卡素，得以中止兩連敗走勢，延續作客好過主場嘅怪奇軌跡。般尼上場一度追平賓福特3:3惜敗，已贏番唔少尊重，上個月兩場波入到三球亦係今季首次。

04/03/2026 03:30 列斯聯(英超15) vs 新特蘭(英超12)

主勝: 56.4% 客勝: 16.4%

列斯聯英超主場踢夜波零舍惡，今季夜晚8點打後開波嘅主場波竟係五場全勝，上仗踢6點半則一球僅負曼城並不失禮。新特蘭則只係剛剛中止三連敗賽和般尼茅夫。

04/03/2026 04:15 狼隊(英超20) vs 利物浦(英超5)

主勝: 14.3% 客勝: 65.5%

狼隊一如所料上輪搏贏維拉士氣大增，呢場打後週五足總盃即要再戰利物浦。狼隊今季打足總盃慣咗輪換，但今場對數勁咁多加上唔想俾對手摸清路數，今場聯賽需留意會唔會反過嚟用副選交差。

05/03/2026 03:30 阿士東維拉(英超4) vs 車路士(英超6)

主勝: 35.0% 客勝: 38.8%

阿士東維拉中場自二月冇晒Tielemans與及隊長McGinn，五場聯賽只贏得兩場，主場僅錄得一勝一和一負冇咩優勢可言，失球雖未算特別多，但每每失守都足以致命，而上輪再輸狼隊聯賽排名亦因此跌至第四，士氣陷入低點。至於車路士同期則只曾擊敗狼隊（客勝），上輪作客阿仙奴更有前鋒Pedro Neto領紅，成為今季隊中第九宗被逐事件。

05/03/2026 03:30 白禮頓(英超11) vs 阿仙奴(英超1)

主勝: 20.8% 客勝: 51.9%

白禮頓連贏兩場合共只失一球，老將前鋒Welbeck同樣兩場入波，主帥重用佢以至Milner兩位老將收到奇效。阿仙奴今季硬撼傳統強隊較有把握，反而有時對住中下游會一不留神送禮，今場作客回勇嘅白禮頓不宜看輕。

05/03/2026 03:30 富咸(英超9) vs 韋斯咸(英超18)

主勝: 45.7% 客勝: 30.9%

兩隊接落嚟都要喺星期六出戰足總盃十六強。客隊韋斯咸到時要硬撼賓福特，顧慮會比主隊更多，相比之下富咸只係要對修咸頓，加上較為習慣喺盃賽稍作輪換，今場調兵遣將應會相對靈活。

05/03/2026 03:30 曼城(英超2) vs 諾定咸森林(英超17)

主勝: 81.0% 客勝: 6.4%

曼城中鋒Haaland上仗因傷缺陣之下仍有Semenyo、Marmoush接得住。班底薄得多嘅森林上輪則係半場轉陣仍無法抵擋白禮頓，新教頭Pereira不經不覺已累積正賽三連敗。

分類:

足球資訊

英超精選賽前分析(04/03/2026-06/03/2026)

分類:

標籤:

關於我們:

快速連結:

聯絡我們: