02/02/2026 熱刺 vs 曼城

足球資訊 | 英格蘭超級足球聯賽(2025/26) | 發布日期: 31/01/2026

比賽日期	主隊	客隊	主勝機率	和局機率	客勝機率
2026-02-02 00:30	熱刺	曼城	19.2 %	23.9 %	56.9 %

主勝機率	和局機率	客勝機率
19.2%	23.9%	56.9%

排名: 英超(14) vs 英超(2)

歐聯聯賽階段結束，英超六隊之中有五隊排前八，直接晉身淘汰賽階段，可算係英超盛世。就算喺聯賽近況點差，對其他歐洲聯賽球隊仍然踢高一班，熱刺就係表表者。聯賽成績不濟，領隊靠歐洲賽續命嘅劇本係咪似曾相識呢？上季下半季樸斯迪哥高奧帶領熱刺，聯賽一直喺下半版徘徊，最後捧歐霸盃而回，但仍難逃被炒一劫，可能已經預視法蘭嘅命運。呢場嘅對手曼城，儘管聯賽表現未算穩定，哥帥仍然得到管理層全力支持，要快翼就引入施曼尤(Antoine Semenyo)，後防傷兵滿營就買古希(Marc Guéhi)，真係同人唔同命。

曼城喺新一年三和一敗於同市宿敵，經歷小低潮後，聯賽終於再打開勝利之門，而且近期狀態回升，歐聯及聯賽連勝。聯賽贏狼隊唔單止為球隊止血，由於阿仙奴喺主場全失三分，令到佢哋同榜首嘅距離拉近到四分。喺新加盟球員未能落場歐洲賽下，仍然靠夏蘭特(Erling Haaland)及卓基(Rayan Cherki) 建功，2:0主場擊敗加拉塔沙雷。近兩場賽事零失球，防線因古希加盟更穩定。古希對狼隊嘅地標戰中，作為中堅，做出全場最高嘅95次傳送。呢位帶刀侍衞今季喺水晶宮助攻助守，射入2球亦有3個助攻，難怪哥帥冬季轉會窗已經即刻要人。

熱刺聯賽表現低迷，新一年五場聯賽三和兩負未嘗一勝，加上繼續受傷患困擾：除咗長期養傷嘅球員之外，列查利臣(Richarlison)同古度斯(Mohammed Kudus)大腿傷患要缺陣至三四月，以致攻力疲弱。上場聯賽對般尼，只係靠雲迪芬(Micky van de Ven)同羅美路(Cristian Romero)雙中堅入波2:2避免三連敗。周中對法蘭克福，倒戈嘅高路姆亞尼(Randal Kolo Muani)先開紀錄，加上後備入替嘅蘇蘭基(Dominic Solanke)奠定勝局射入成2:0。法蘭賽後話希望高路姆亞尼對前東家嘅入球，能夠俾倒佢信心喺聯賽開齋。

首循環熱刺作客憑班倫莊臣(Brennan Johnson)，同祖奧柏連拿(João Palhinha)入波2:0贏曼城。今次返到自己地頭，又未必有主場之利。法蘭主場勝率極低(平均0.82分一場)，係熱刺史上主場表現最差領隊。球隊聯賽狀態低迷，近八場只係贏過一場得6分。反觀對手曼城向來下半季後上能力極高，喺2022/23球季，同當時阿仙奴嘅積分差距更大，憑住凌厲嘅後勁連贏十二場，期間只係輸咗兩場，之後嘅球季更加係下半季不敗。一月份新兵加盟表現對板，亦毫無疑問令曼城實力增強。除非熱刺打出頂級防守，否則難阻曼城全取三分。

分類:

足球資訊

02/02/2026 熱刺 vs 曼城

分類:

標籤:

關於我們:

快速連結:

聯絡我們: