03/11/2025 曼城 vs 般尼茅夫

足球資訊 | 英格蘭超級足球聯賽(2025/26) | 發布日期: 01/11/2025

比賽日期	主隊	客隊	主勝機率	和局機率	客勝機率
2025-11-03 00:30	曼城	般尼茅夫	82.4 %	10.5 %	7.1 %

主勝機率	和局機率	客勝機率
82.4%	10.5%	7.1%

排名: 英超(5) vs 英超(2)

曼城對般尼茅夫，以往唔算係矚目賽事，般尼茅夫就算近年成績唔錯，但由於欠穩定性，仍然只係中遊分子。曼城喺英超主場出戰般尼茅夫八次全勝。兩隊對賽十六次，曼城贏咗十五次，般尼茅夫唯一一次嘅勝利，就係上季主場贏曼城2:1。只睇賽果就一面倒，但近況就般尼茅夫較佳，自開鑼戰輸咗俾利物浦後，到而家仍然不敗，處於球會喺英超最長嘅不敗走勢，高据聯賽榜次席。曼城排第五，兩隊相差其實只係兩分，換言之呢場大戰，隨時令兩隊喺聯賽榜位置對調。

哥帥領軍嘅球隊從來唔係一人球隊，嚟到今季，曼城嘅表現開始變得異常。球隊有個表現穩定嘅射手當然係好事，但若果變得依賴，一旦佢表現失準，整個戰術體系嘅漏洞就暴露晒。上場聯賽對維拉，夏蘭特(Erling Haaland)終於食白果，亦等於曼城冇波入。今季夏蘭特聯賽11個入球，佔球隊總入球17球嘅64.7%，暫時係英超史上最高。數到第二最多入波嘅，並唔係自己友，而係般尼中堅艾斯特夫(Maxime Estève)嘅兩個烏龍波，換言之其餘就係四個球員各入一球。對維拉落敗後，哥迪奧拿指出，其他球員亦需要挺身而出，當製造到機會嘅時候，就要入波。哥帥公開告誡之後，週中聯賽盃對史雲斯，曼城一度落後，最終靠馬莫殊(Omar Marmoush)同卓基(Rayan Cherki)嘅入球，反勝3:1成功晉級。

伊拉奧拿帶領般尼茅夫創下英超頭九場賽事以嚟最佳開局，上星期輕取新帥上任嘅諾定咸森林2:0。相比起曼城要靠夏蘭特，般尼茅夫就遍地英雄。儘管今季整條防線換咗，呢位西班牙主帥默默重建陣容，增兵之時亦能保持踢法不變。主場對森林上半場以具壓迫性同高強度踢法令對手難以招架。球員靠快速短傳，出色嘅走位引開森林後衛。19歲嘅法國小將確比(Eli Kroupi)聯賽上陣六場，有四個入球。加上今季狀態大勇嘅施曼尤 (Antoine Semenyo)表現出色，正緊追夏蘭特爭奪金靴。今場伊雲尼遜(Evanilson)傷愈復出，球隊進攻嘅深度亦唔少。

論火力，今季般尼茅夫喺曼城之上，佢哋壓迫嘅踢法，往往令到對手吃盡苦頭。不過曼城喺主場勢強，進攻同防守都有紀律，始終球員質素亦較高，般尼茅夫要作客取分以迫近榜首阿仙奴並唔容易。

分類:

足球資訊

03/11/2025 曼城 vs 般尼茅夫

分類:

標籤:

關於我們:

快速連結:

聯絡我們: