英超新球季第一週即上演一場「四冠之爭」，接連喺歐協聯、世冠盃封王嘅車路士主場迎戰連奪足總盃及社區盾冠軍水晶宮。水晶宮今夏可謂禍福參半。球隊剛喺溫布萊力壓利物浦捧走社區盾，門將甸軒達臣（Dean Henderson）繼上季季尾足總盃決賽後再做十二碼撲救大師，協助球隊先後擊敗曼城同利物浦贏得兩項錦標，氣勢一時無兩。不過球隊原本憧憬嘅歐霸盃之路，卻因為老闆John Textor同時喺里昂持股，被歐洲足協終極裁定違規只能轉戰歐協聯。除咗見財化水唔見一大筆收入外，亦間接影響球隊留住主力嘅牙力。呢刻已傳到好行隊長馬克古希（Marc Guehi）會喺夏窗即轉投利物浦，與此同時水晶宮本來就冇乜重要收購，新開季遇著咁嘅形勢確係有啲掃興。

車路士先前喺美國力壓大熱門PSG勇奪世冠，成為今夏最早收獲錦標嘅英超球隊攞晒頭彩。呢番榮耀嘅背後，主帥馬利斯卡與及一班新援嘅表現備受矚目。今夏車路士「延續本色」再現大換血，八個要俾轉會費嘅新援合共洗咗2.8億歐元。其中最搶鏡嘅莫過於從白禮頓來投嘅前鋒祖奧柏度（Joao Pedro），轉會費過6000萬歐羅嘅祖奧柏度勝在有世冠幫佢快速融入，先後喺世冠以至友賽入波，睇嚟已即時接棒做到主力，再加上葉士域治過檔嘅另一前鋒戴納（Liam Delap）友賽AC米蘭亦已取得入球，初步睇車仔前線已cover到彭馬（Cole Palmer）前面一次過唔見晒祖奧菲歷斯、辛祖、馬度基嘅震蕩（傳聞車仔今期還要清洗埋尼高拉積遜與及尼干古）。車仔前面係威係勢，後防人手就較為吃緊，除主力中堅高維傷膝有排抖之外，頂上嘅查洛巴（Trevoh Chalobah）喺對AC嘅比賽中亦因傷提前退下火線，希望冇乜大礙。