英超精選賽前分析(09/05/2026-12/05/2026)

足球資訊 | 英格蘭超級足球聯賽(2025/26) | 發布日期: 07/05/2026

直播資訊: Now TV, NowE

09/05/2026 19:30 利物浦(英超4) vs 車路士(英超9)

09/05/2026 22:00 白禮頓(英超8) vs 狼隊(英超20)

主勝: 63.7% 客勝: 15.5%

白禮頓近況原本極順，3:0力克車路士後作客紐卡素卻遇上右閘Wieffer早早傷出，五場不敗走勢就此告終，排名又跌番出歐賽位置以外，面對狼隊就算Wieffer未及復出亦務必要把握機會盡搶三分。狼隊上仗主場1:1賽和新特蘭開出新一波五場不勝，作客更係今季未開齋，恐怕最後希望都係要留到收爐戰作客般尼。

09/05/2026 22:00 新特蘭(英超12) vs 曼聯(英超3)

主勝: 33.4% 客勝: 42.4%

曼聯上週造出十年來嘅首次雙殺利物浦，全取三分後更已穩奪下季歐聯資格。Carrick上任後獲得重生兼剛剛續約嘅防中Mainoo愈戰愈勇。今場L.Martinez終可復出鞏固後防，但前線有機會要同時失去Cunha（休養備戰世界盃）與及Sesko（有傷）。

10/05/2026 00:30 曼城(英超2) vs 賓福特(英超7)

主勝: 69.8% 客勝: 12.9%

曼城上場作客愛華頓再見到球員出現疲態，最終激戰成3:3，防線因Guehi嚴重犯錯送禮斷送兩分，爭冠形勢急轉直下，中場Rodri對水晶宮則未有列入名單之中，今場能否復出成疑，還未計星期三仲夾多咗一場對水晶宮嘅補賽。賓福特上週大勝韋斯咸只不過係近七場嘅首勝，但大部分時間keep得住個第七位保住進軍歐洲賽嘅希望，今仗未必輕易放軟手腳。

10/05/2026 21:00 般尼(英超19) vs 阿士東維拉(英超5)

主勝: 25.0% 客勝: 46.6%

維拉為備戰星期四歐霸次回合對森林嘅主場比賽, 上週聯賽不惜大幅度輪換送晒三分俾熱刺。最終維拉如願大勝森林4:0自1982年以嚟首次殺入歐洲盃賽嘅決賽，中場McGinn復出即射入兩球，而另一有傷嘅防中Onana則仍未復出。

10/05/2026 21:00 水晶宮(英超15) vs 愛華頓(英超10)

主勝: 48.6% 客勝: 20.6%

水晶宮今期賽程密過好多隊，因歐協聯四強次回合要留力同薩克達激戰，下週四又攝多咗一場對曼城嘅補賽，上場英超留力之下俾般尼茅夫數夠3:0。一方面，主帥Glasner喺臨走前率領球隊首次打入歐洲賽決賽，士氣實係高昂，但另一方面佢哋打少一場距離降班區七分、餘下賽程卻係要對晒爭標嘅阿仙奴同曼城，今仗迎戰剛賽和曼城嘅愛華頓，兵源有限嘅水晶宮搶分壓力好大。

10/05/2026 21:00 諾定咸森林(英超16) vs 紐卡素(英超13)

主勝: 39.4% 客勝: 31.7%

主隊上週有前鋒Awoniyi傷癒復出取得入球，作客3:1擊敗車路士，聯賽已七場不敗，護級形勢已大為改善。可惜係呢場期間中場Gibbs-White同車仔門將Sanchez碰撞導致面部受傷，球會雖然已幫佢準備埋鬼面罩，但星期四嘅歐霸四強次回合仍係未有落場目送球隊俾維拉橫掃出局。紐卡素教練Howe堅持前線唔用三個高價收購球員，上週主場贏白禮頓終止四連敗稍為止血。

11/05/2026 23:30 韋斯咸(英超18) vs 阿仙奴(英超1)

主勝: 25.4% 客勝: 52.0%

韋斯咸上週輸波同時熱刺贏波，排名就此對調，跌番落護級組嘅韋斯咸壓力進一步增加。阿仙奴星期二場歐聯四強之前一場大勝富咸，一傳一射嘅Saka重拾狀態被視為係阿記回穩以至殺入歐聯決賽嘅關鍵，加上曼城意外和波失分，對阿記就更能起鼓舞作用。

12/05/2026 03:00 熱刺(英超17) vs 列斯聯(英超14)

主勝: 47.0% 客勝: 35.6%

熱刺狂追尾班車作客2:0擊敗大幅度輪換嘅維拉，取得兩連勝，同時因韋斯咸輸波雙方位置互換，話雖如此護級壓力依然唔輕。始終隊中傷兵情況嚴峻，暫時仍係靠中鋒Richarlison力挽狂瀾，對列斯聯往績更係奇在已經五連敗。列斯聯上週主場贏般尼如願搶齊三分，現時排第14仍未肯定安全，仍需爭取盡快儲夠分數確定留級。

分類:

足球資訊

英超精選賽前分析(09/05/2026-12/05/2026)

分類:

標籤:

關於我們:

快速連結:

聯絡我們: