21/09/2025 阿仙奴 vs 曼城

足球資訊 | 英格蘭超級足球聯賽(2025/26) | 發布日期: 20/09/2025

比賽日期	主隊	客隊	主勝機率	和局機率	客勝機率
2025-09-21 23:30	阿仙奴	曼城	33.6 %	28.9 %	37.4 %

主勝機率	和局機率	客勝機率
33.6%	28.9%	37.4%

排名: 英超(2) vs 英超(8)

直播資訊: Now 611/621, NowE

本週英超壓軸大戰，上場各以三比零大勝對手嘅阿仙奴惡鬥曼城。曼城上兩次作客酋長球場都輸波，聯賽近四仗對阿仙奴都未能取得勝利，哥迪奧拿如果再一次贏唔到徒弟，阿迪達將會成為第一位五場聯賽對哥迪奧拿不敗嘅英超領隊。

阿仙奴今季增兵之後，陣容華麗兼有質素有深度，以往最擅長嘅死球戰術，今季加上中鋒元素，好似喺周中歐聯對畢爾包下半場，阿仙奴嘅死球就搵到基奧基尼斯(Viktor Gyökeres)，可惜頭槌頂斜。當賽事去到膠着狀態，後備入替嘅馬天尼利(Gabriel Martinelli)同杜沙特(Leandro Trossard)各入一球幫球隊奠定勝局。兵工廠頂級嘅硬件齊全，戰術運用得宜將會係爭標關鍵。對利物浦時踢法過於保守，中場蘇比文迪(Martin Zubimendi)搭美連奴(Mikel Merino)創造力欠奉。阿迪達以防守為先嘅踢法，成功令失求減少，然而今季中前場動力夠晒，冇理由唔盡量利用呢個優勢。對曼城如果能放棄消極保守踢法，絕對有機會贏漂亮一仗。

對手曼城嘅科頓(Phil Foden)，幫曼城贏咗英超四連霸之後，上季沉寂一年，今季重新出發，喺打吡戰頂入一球。隊友夏蘭特(Erling Haaland)亦延續國家隊嘅頂峰狀態，由自己半場單刀射入曼聯大門。周中歐聯對拿玻里，呢兩位又係主角，賀蘭特接應科頓嘅傳送頂入。佢哋表現出色信心爆棚，帶領整隊波重拾霸氣。防守上，新加盟嘅當拿隆馬(Gianluigi Donnarumma)喺打吡戰撲出禁區內麥比奧莫嘅窩利力保不失。只係踢咗兩場，已經連番施展佢嘅門神本色，除咗身形高大，反應同撲救能力都展現級數。阿仙奴嘅死球或者快速反擊，臨門一腳都需要先過當拿隆馬一關。

呢場曼城贏波就能夠證明球隊重拾正軌，而阿仙奴輸咗比利物浦，亦須一場勝仗，顯示自己有力爭標。兩隊實力接近，曼城復甦嘅攻力，將會為主隊阿仙奴帶來極大威脅。

分類:

足球資訊

21/09/2025 阿仙奴 vs 曼城

分類:

標籤:

關於我們:

快速連結:

聯絡我們: