英超賽前分析(24/01/2026-27/01/2026)

足球資訊 | 英格蘭超級足球聯賽(2025/26) | 發布日期: 23/01/2026

直播資訊: Now TV, NowE

24/01/2026 20:30 韋斯咸(英超18) vs 新特蘭(英超9)

韋斯咸上週靠熱刺幫忙終結十場不勝。新加盟前鋒Castellanos有助於提升攻擊火力，但球隊整體仍依賴Wilson作為主要得分點（上場對熱刺有波入）。

24/01/2026 23:00 般尼(英超19) vs 熱刺(英超14)

熱刺星期二歐聯只有12個一隊球員可用（中場新援Gallagher暫未註冊），都仍能背水一戰淨勝多蒙特兩球，但呢場波再傷埋中場Bergvall，主帥Frank實行做一日和尚就敲一日經。

24/01/2026 23:00 富咸(英超11) vs 白禮頓(英超12)

白禮頓教練Hürzeler一再強調要改善球隊有頭威冇尾陣嘅老毛病，但講就容易，如果仍係靠三笘薰獨自努力而後防繼續唔穩，對於富咸而言其實好易應付。

24/01/2026 23:00 曼城(英超2) vs 狼隊(英超20)

曼城早已去搵仿真草場練場準備遠征挪威，歐聯作客波杜基林特最終仍要輸波，更令人擔憂係傷兵情況令隊波失去默契，中場Rodri復出以嚟亦無復當年勇，番到聯賽就要靠新援Guehi鎮住後防。

25/01/2026 01:30 般尼茅夫(英超15) vs 利物浦(英超4)

利物浦出到去歐聯仍可以蝦蝦霸霸（剛作客贏馬賽3:0），番到英超對手較為熟路就仍需努力改善攻防兩邊嘅穩定性。主隊般尼茅夫近14場只贏到一場，但其實唔少場次都識入波，紅軍或會慶幸Semenyo已經轉投曼城。

25/01/2026 22:00 賓福特(英超7) vs 諾定咸森林(英超17)

賓福特上週作客輸俾車路士前已累積四勝二和共六場不敗嘅佳績，前鋒Thiago今季已攻入16球，面對下游球隊尤其有把握。

25/01/2026 22:00 紐卡素(英超8) vs 阿士東維拉(英超3)

兩隊喺呢兩個禮拜同樣要兼顧前後兩場歐洲賽事。紐卡素歐聯直接出線仍未穩陣或有多啲顧慮，而維拉喺歐霸雖然已出硬線，但近日傳出門將Martinez俾國際米蘭睇中，教練Emery真係多得佢哋唔少。

26/01/2026 00:30 阿仙奴(英超1) vs 曼聯(英超5)

阿仙奴上週對森林未出盡全力，星期二作客國際米蘭亦未將最佳陣容放入正選名單之中，最終仍夠贏3:1，可見今期陣容係幾咁豪華。重組還原踢四後衛嘅曼聯唔經唔覺已係聯賽五場不敗，嚟緊就算未敢即刻宣佈重返歐戰陣營，但間中踢番出預期水準亦足以打亂列強陣腳。

27/01/2026 04:00 愛華頓(英超10) vs 列斯聯(英超16)

列斯聯轉打3-5-2繼續有表現，上週1:0 擊敗富咸，後備前鋒Nmecha補時建功取得傷癒復出後首個入球，被領隊Farke 形容為「今季最佳勝仗之一」，但需留意防中隊長Ampadu停賽復出兩場即收咗兩張黃牌（今場愛華頓中堅Keane停賽）。