英超首輪皇者本色重現嘅曼城，今個星期將會喺主場惡鬥熱刺。兩隊上週共向對手派左七隻蛋，曼城作客狼隊大勝4:0，熱刺主場贏般尼3:0。

 

曼城中場雷恩達斯(Tijjani Reijnders)英超地標戰入球助攻各一，表現令人眼前一亮。呢位來自AC米蘭嘅上季意甲最佳中場，賽後哥迪奧拿就讚不絕口，形容佢勤力又拼搏，覆蓋面廣，無球在腳走位一流，兼能夠後上入波，填補咗上季球隊欠缺洛迪(Rodri)中場「穿窿」嘅情況。對狼隊時曼城踢法帶壓迫性，攻守轉換較以往快速，主要因為今季引入前高普副手連達斯(Pepijn Lijnders)。連達斯喺離開利物浦後去到薩爾斯堡只係教得半季，哥帥接受訪問時講到今次同佢一拍即合，將佢以往執教風格，包括逼搶強度同節奏帶入球隊。對狼隊嘅第2球，中場搶奪成功開始反擊，傳比雷恩達斯埋齋後，哥迪奧拿亦即刻走去擁抱連達斯慶祝，意味着新一季哥帥嘅傳控風格會有所改變，加入佢曾經提到嘅現代足球元素。

 

同日熱刺主場3:0擊敗般尼，上季聯賽只係入咗4球嘅李察利臣 (Richarlison)梅開二度，其中一球精彩倒掛更令新領隊法蘭認為足以成為今季英超金球，兩個入球都係靠新兵古度斯(Mohammed Kudus)嘅助攻，證明熱刺冇入錯貨。賽後領隊法蘭大讚沉寂多時嘅李察利臣，認為佢作為前鋒喺走位，串連，仲有埋門都水準極高。熱刺今季冇咗孫興慜，鋒線需要補強。今季英超嘅軍備競賽特別激烈，買人要成功必須「快狠準」。熱刺同阿仙奴嘅打吡戰場就瞬間轉移到轉會市場，據報道熱刺原本同水晶宮嘅艾斯(Eberechi Eze)達成轉會協議，埋門一腳竟然比同市宿敵阿仙奴騎劫成功。

 

雙方陣容同傷停情況將成為對戰嘅關鍵因素，曼城仍然有主力缺陣，科頓(Phil Foden)同洛迪仍未復出。高華傑治(Mateo Kovacic)則跟腱受傷，至於沙維奧(Savinho)亦需要養傷幾個星期。熱刺方面占士麥迪臣(James Maddison)，古路錫斯基(Dejan Kulusevski)和達古辛(Radu Dragusin)仍然養傷，中場硬漢比素馬(Yves Bissouma)操練時又受傷，喺主力受傷嘅情況下，雙方極有可能維持陣容不變。