英超教練：難捱又要做？

足球資訊 | 英格蘭超級足球聯賽(2025/26) | 發布日期: 09/01/2026

今季英超一踏入2026年，車路士同曼聯即率先炒教練，呢兩宗大事唔只係球會內部問題，更加係各隊管理理層決策角力嘅縮影。

車路士方面，馬利斯卡挾住個世冠盃冠軍都要被炒，勢估唔到呢個銜頭先至係催命符。馬利斯卡幫球會贏咗個咁大型而獎金又好和味嘅大賽，自然希望擴大自己影響力，但與此同時成個暑假都貢獻咗俾世冠盃，球員狀態恢復受到影響，開季接連輸俾曼聯、白禮頓，錯失咗鞏固積分嘅關鍵時機，與此同時攻中彭馬（Cole Palmer）、從已降班嘅葉士域治接收嘅前鋒戴納（Liam Delap）等進攻球員輪住受傷，而上季表現不過不失嘅尼高拉積遜（Nicolas Jackson）又一早借咗俾拜仁慕尼黑，及後去到防中猛將卡斯度（Moises Caicedo）自十二月起先後停賽四場，同期車仔就踢出一勝三和二負嘅超差成績，怕且都只係借傷成毒，去到呢刻馬利斯卡似乎已係無心戀戰、唔想再同樓上嗰五位體育總監糾纏。又原來對於呢班總監而言，彭馬叫到好價錢嘅話原來係可以即刻賣走。

至於緊隨其後俾曼聯掃出家門嘅艾摩廉，就更加係求仁得仁。話說14個月前曼聯搵得艾摩廉，都已一早知佢喺葡超係打3-4-3起家，用得艾摩廉，都預咗要將一直踢開嘅四後衛打法、以至用人大執位。呢方面曼聯高層看似好配合，喺艾摩廉入主後嘅夏季轉會窗，買人就已洗咗超過二億歐羅，但買入嘅球員有前有後就冇為中間補強，而人選亦傳出唔係艾摩廉嘅心水。喺轉會人選方面，以做到領隊為目標嘅艾摩廉最終發現自己由始至終都只能係一個名副其實嘅教練，1:1僅和列斯聯之後見記者時大暴走，更佳嘅解讀係艾摩廉早已進入搏炒嘅攤牌地步。當執包袱後俾記者影到嗰陣，艾摩廉係笑騎騎嘅，網民都禁不住講：連扮慘都費事啊陰功。

值得注意嘅係，呢兩間豪門引發嘅換帥潮恐怕未會咁快停落嚟。英超球會對領隊、教練嘅要求與日俱增，容忍度已變得史無前例嘅低，任何短期成績下滑都會即時引發高層壓力。例如熱刺教練法蘭克近月亦都捲入下台傳聞。自佢今季上任以嚟，熱刺創造力明顯不足，球隊表現持續低迷，過去12場英超只贏到兩場（法蘭克治下嘅熱刺打英超平均每場只得1.37分，比賓福特時代嘅1.51分還要低）。法蘭克一直強調球隊面對傷病同停賽困擾，亦話得到董事會支持，但外界普遍認為如果球隊短期內無法改善成績、管理層一旦發現主場氣氛失控，法蘭克隨時就會成為下一個被炒主帥，哪怕理由就只係因為錯手拎咗印有死敵阿仙奴會徽嘅杯去飲水。

另一位又係咁俾人話勢危嘅大球會教練就一定要講到利物浦嘅史諾。今季紅軍防守死球時失分嚴重，如果上帝可以扣減「利記」今季已失嘅12個死球（截至第20週），佢哋就已經做得番top 3。利物浦暫時嘅處理係解僱負責死球訓練嘅技術教練Aaron Briggs，但假如情況冇改善嘅話，史諾會唔會係進一步要問責下台嘅高層呢？

車路士、曼聯換帥事件，正好反映英超現時管理層決策高壓、對成績波動容忍度極低，無論豪門或中游球隊，主教練都隨時面臨危機。但正所謂食得鹹魚抵得渴，個幾月前列斯聯作客曼城半場輸到0:2，領隊法卡喺聞到魷魚香之際當機立斷改踢3-5-2，從此踢出一波七場不敗。如今又傳出「蘇B」蘇斯克查大送秋波，就算只有半年合約都想重返曼聯「覆桌」。英超教練呢個位壓力大名利亦都大，確係令一眾教練又怕又愛。

分類:

足球資訊

英超教練：難捱又要做？

分類:

標籤:

關於我們:

快速連結:

聯絡我們: