英超精選賽前分析(28/02/2026-02/03/2026)

足球資訊 | 英格蘭超級足球聯賽(2025/26) | 發布日期: 26/02/2026

直播資訊: Now TV, NowE

28/02/2026 04:00 狼隊(英超20) vs 阿士東維拉(英超3)

主勝: 25.5% 客勝: 47.3%

維拉上週賽和列斯聯，已俾曼聯追至只爭三分，壓力漸大。狼隊接連賽和森林同阿仙奴，而下週起又會連鬥利物浦兩場（英超、足總盃十六強），今週主場出戰近況不穩嘅維拉，或能激發更多戰意。

28/02/2026 20:30 般尼茅夫(英超8) vs 新特蘭(英超12)

主勝: 64.4% 客勝: 10.6%

新特蘭隊長Xhaka復出仍難阻止球隊三連敗，作客英超已經七場不敗嘅般尼茅夫並不樂觀。喺般尼茅夫上週同韋斯咸互交白卷之前，新援中鋒Rayan每場都有一個入球或助攻。

28/02/2026 23:00 般尼(英超19) vs 賓福特(英超7)

主勝: 17.8% 客勝: 61.2%

般尼新一年改打3-4-2-1偶有斬獲，上週補時合力炮製入球追平車路士嘅Ward-Prowse、Flemming亦已係好耐未有建樹。賓福特自季中開始亦有明顯進步，上週主場對白禮頓嘅上半場卻係近十場守得最差嘅一次，完半場前輸夠0:2已經神仙難救。

28/02/2026 23:00 利物浦(英超6) vs 韋斯咸(英超18)

主勝: 68.6% 客勝: 13.6%

利物浦接連對賽下游嘅森林、韋斯咸，對前者只能小勝1:0，翼鋒Salah變番沉寂再度成為討論焦點。而論近況嘅話韋斯咸會比森林還要好。

28/02/2026 23:00 紐卡素(英超11) vs 愛華頓(英超9)

主勝: 49.7% 客勝: 29.8%

紐卡素星期二踢歐聯附加賽次回合大把在手，可以通過輪換保留到更多實力，但要留意中場繼Miley後就連Ramsey都有啲傷未知能否待命，中後場嘅支援供應或受影響。

01/03/2026 01:30 列斯聯(英超15) vs 曼城(英超2)

主勝: 14.1% 客勝: 67.6%

曼城自曼市打比輸波以嚟聯賽踢出四勝一和，中鋒Haaland回勇近四場都有入球或者助攻，就算左翼Doku仍未知能否趕及今場復出，單就現時人腳而言仍係算充裕，列斯聯近期接連摸和車路士、維拉相信亦已令曼城上下不敢鬆懈。

01/03/2026 22:00 白禮頓(英超14) vs 諾定咸森林(英超17)

主勝: 51.6% 客勝: 23.2%

白禮頓上週作客贏賓福特，終結咗英超六場不勝，但較似屬於偶發事件，進攻路數易估與及防守不穩仍有待改善。森林星期四主場踢歐霸附加賽次回合，三球在手大幅輪換幾乎出事最終都要換入主將穩定局面。將防反重新帶番入森林嘅Pereira踢三場輸兩場，但就係贏咗最關鍵嗰一場。

01/03/2026 22:00 富咸(英超10) vs 熱刺(英超16)

主勝: 39.9% 客勝: 37.5%

熱刺新帥Tudor首仗即大敗俾同城宿敵阿仙奴1:4，爭議判決以外難掩被技術性擊倒嘅現實，球員亦都未係好執行到Tudor嘅想法，已跌到落第16名嘅熱刺需要拎出護級嘅勇氣打埋餘下嘅賽程。

01/03/2026 22:00 曼聯(英超4) vs 水晶宮(英超13)

主勝: 52.0% 客勝: 22.1%

曼聯上場一球贏愛華頓，今季新三叉戟合作快轟得分令擁躉有番似曾相識嘅感覺。水晶宮上週中踢歐協聯作客只能賽和，今週四次回合需要原班人馬搏盡，消耗未必能咁快恢復。

02/03/2026 00:30 阿仙奴(英超1) vs 車路士(英超5)

（請留意網站詳細分析）