07/02/2026 曼聯 vs 熱刺

足球資訊 | 英格蘭超級足球聯賽(2025/26) | 發布日期: 06/02/2026

比賽日期	主隊	客隊	主勝機率	和局機率	客勝機率
2026-02-07 20:30	曼聯	熱刺	42.5 %	24.2 %	33.4 %

主勝機率	和局機率	客勝機率
42.5%	24.2%	33.4%

排名: 英超(4) vs英超(14)

直播資訊: Now 611/621, NowE

曼聯今期表現令人注目，喺接連攻陷曼城、阿仙奴兩大強敵之後，又喺上星期以3:2險勝富咸，令全球花生友又再關注嗰位已經超過一年唔剪髮嘅曼迷，能否等到曼聯連勝五場呢個佢最期待嘅畫面。對於要求曼聯五連勝呢個看似遙不可及嘅目標，今期最難兩關意外地安然渡過咗，而再下一場作客韋斯咸照計又係最容易過嘅尾關，今場對熱刺就無端端成為另類嘅關鍵一戰。

當然，如果你自認睇波認真而唔會理花邊新聞，今場主場對熱刺亦可以視之為名宿兼新帥卡域克嘅真正考牌戰。承接看守教練費查嘅打法，卡域克續用4-2-3-1陣式，重新關注中場與前後兩線嘅聯繫，一班艾摩廉入主前嘅舊人得以發洩之餘，大家踢爭氣波討好新教頭亦係意料中事，阿仙奴、曼城都可以話係有啲唔好彩。但上場對富咸亦正好睇到成也防中敗也防中，打從獨取一個入球一個助攻嘅卡斯美路（Casemiro）退下火線，曼聯隨即失去對球賽嘅控制能力，尾段更係連失兩球出現險情。呢位年屆33歲、一早講低季尾離開嘅老臣子喺餘下嘅日子點樣善用，將係卡域克嘅一大課題。至於卡域克自己，佢份教練合約就只係呢半季，曼聯喺出面仍有一直搵人，其中就傳出有意從歐聯墮馬嘅馬賽手中帶番迪些比回歸英超。雖然現時曼聯嘅組合未必可以維持好耐，但總算捱到今日排名第四，爭取重返歐聯嘅推動力同凝聚力實在不容忽視。

曼聯狠下決心換帥初見成效，相較之下上季一齊擺爛、然後雙雙殺入歐霸決賽嘅熱刺如今則係繼續沉淪。今季先至入主嘅教練法蘭克儘管已成為熱刺球迷眼中釘，但仍手執三件法寶：首先有大老細照住，其次可以歸咎於傷兵太多又要兼顧歐聯戰線，第三則係死球經常得手，熱刺今季英超死球入波佔全部入球比例去到三成半，剛好彌補番傷兵多出現喺前線嘅缺口。咁當然，人手短缺呢個炸彈隨時都會再爆，例如上場對曼城射入兩球嘅中鋒蘇蘭基（Dominic Solanke）威風八面，轉個頭就已經話腳傷未清要逐日觀察，熱刺陣容不整、易生變卦嘅問題短期內都難以解決。

分類:

足球資訊

07/02/2026 曼聯 vs 熱刺

分類:

標籤:

關於我們:

快速連結:

聯絡我們: