今季聯賽早已報銷，所謂爛船都有三斤釘，何況以陣容嚟講，熱刺同曼聯係一啲都唔爛，如果唔係傷患問題，絕對唔會喺榜尾，所以能夠打到入歐霸決賽亦唔意外。歐霸冠軍對兩隊而言極為重要，唔只係一個榮譽，亦係收入來源，更可能救領隊一命。歐霸今季改制後，再冇歐聯隊中途跌落歐霸，可觀性相對減低，兩隊難兄難弟，喺聯賽榜齊齊守住尾門，將英超傳統Big 6大戰搬上歐洲舞台變成夢幻決賽，只有一隊最後能用冠軍挽救一個令人失望嘅球季。

 

為迎戰週三嘅歐霸決賽，兩隊提早喺上星期五踢聯賽。縱使喺聯賽已經冇嘢好爭，決賽前幾日要對爭前五嘅維拉同車路士，唔使講都估到會發生咩事：對手為爭3分如狼似虎，自己就精神體力上期待大戰來臨。兩隊最後都輸波，兼且未能取得入球。兩個領隊對備戰嘅取態有啲唔同，樸斯迪哥高奧聯賽就讓主力休息，阿摩廉就希望主力能夠繼續上陣保持狀態。

 

兩隊嘅傷兵潮延續到季尾，熱刺叫傷兵少啲，但決賽前兩位攻擊主力古魯錫斯基(Dejan Kulusevski)同占士麥迪臣(James Maddison)膝傷，將會缺陣決賽，熱刺攻力同創造力有隱憂。孫興慜只係剛傷癒，狀態仍未完全恢復，預計會由兩場四強都擔任正選嘅李察利臣(Richarlison)同蘇蘭基(Dominic Solanke)負責攻堅。曼聯嘅約賀(Leny Yoro)同迪列治(Matthijs de Ligt)有機會趕及復出。喺歐霸之路，曼聯入球唔少，四強次回合以4:1擊敗畢爾包，剛傷癒復出嘅阿密迪亞路(Amad Diallo)同曼治(Mason Mount)表現突出，後者更連入都兩球，將會係阿莫廉考慮之列。

 

今季熱刺曾經喺兩場聯賽加聯賽盃八強三殺曼聯，有格食格嘅味道，但曼聯喺歐霸戰鬥力驚人，亦往往能夠喺臨完場前奠定勝局，以不敗紀錄進入決賽，喺「霸氣盃」比熱刺更具霸氣。今季歐洲球壇，打破錦標荒嘅童話式結局相繼出現：紐卡素贏聯賽盃，水晶宮贏足總盃，意大利盃冠軍博洛尼亞，荷蘭盃冠軍伊高斯，就連前熱刺隊長哈利簡尼亦終於開齋贏到職業生涯第一個重要獎項。一直俾人笑無冠嘅熱刺，如果能夠喺歐霸封王，歐洲球壇亦會有一個令人難忘嘅球季。

 

預計兩隊正選陣容

熱刺

Vicario - Pedro Porro, Romero, Van de Ven, Udogie - Sarr, Bissouma, Bentancur - Johnson, Solanke, Richarlison

 

曼聯

Onana - Yoro, De Ligt, Maguire - Mazraoui, Ugarte, Casemiro, Dorgu - Diallo, Højlund, Fernandes