2024/25球季嚟到尾聲，熱刺、曼聯同樣喺英超變成自由落體。現時熱刺排17位（38分），曼聯16位（39分，得失球差去到-12），因為「降班三雄」早有眉目而令雙方都夠膽全力「留力歐霸決賽」。然而，足球世界只會記得「贏家」，今屆決賽完後被奉為「神機妙算」嘅就只能係最終小勝一球嘅熱刺。

熱刺喺決賽嘅部署同執行力都比曼聯要好。今場熱刺係採用五月以嚟開始用番嘅4-2-3-1陣型出戰，上半場得手後再靈活調整為五後衛，雖則全場控球率得番唔夠三成，但就成功頂住咗曼聯全場16次射門。熱刺全季飽受傷病困擾，長期要喺缺少古路錫斯基（Dejan Kulusevski）、占士麥迪臣（James Maddison）參與進攻之下捱打，卻令教練普斯迪高古不得不起用青年球員。今場決賽由22歲中場柏沙亞（Pape Matar Sarr）送出精彩助攻俾23歲翼鋒班倫莊臣（Brennan Johnson）射入奠勝一球，無疑係賽後用嚟「馬後炮」嘅絕佳素材。熱刺亦因為呢一個入球，贏得自1984年以嚟嘅第一座國際賽獎盃。不過公平啲講句，熱刺喺哈利卡尼（Harry Kane）遠走德國、隊長孫興慜狀態下滑嘅不利環境下，班倫莊臣今季正賽仍錄得18個入球、7個助攻，呢位威爾斯國腳確喺隊中自有其關鍵作用。

曼聯喺英超同樣擺爛，到決賽前多名大牌球員都傷癒趕及待命，偏偏呢個時候教練艾摩廉就似患上選擇困難症。起用近一兩個月復出嘅後衛梳爾（Luke Shaw）以至攻中曼治（Mason Mount），大可話係信名牌、對康復進度有信心，但大家都知打攻中先有作為嘅隊長般奴費南迪斯（Bruno Fernandes）因此而再一次擠咗去正中場位置，呢一系列操作亦間接影響咗前鋒位置海倫（Rasmus Hojlund）與及趕住復出嘅舒克斯（Joshua Zirkzee）嘅表現，種種令人迷惘嘅戰術選擇最終令曼聯踢到一團糟，雖然全場攻門達16次，但xG其實就只係得0.97（引用Fotmob數據。有趣係熱刺xG僅比最終入球數字多出0.01），最終亦令曼聯今季被熱刺「四殺」，四場之中更係有三場食白果。

無冠、無錢嘅曼聯喺下季嘅壓力有增無減。雖然已經傳得好勁會斟掂狼隊當家前鋒根夏（Matheus Cunha）下季來投，但正如我哋喺三個月前所做嘅診斷一樣，財源日漸枯歇嘅曼聯喺場上嘅問題主要在於中場因各種原因而出現嚴重錯置（今場決賽可以話係衰同一問題），暫時只係補充強力前鋒仍不足以扭轉局面。而艾摩廉自己亦都擺爛唔在乎外界批評堅持己見，若果抖暑過後仍未見到起色，一旦又要執包袱曼聯到時又要再一次陷入無限reset嘅惡性循環。

喺星期六嘅英超煞科日，曼聯、熱刺將會懷住不同嘅心情應戰。熱刺主場迎戰搶八嘅白禮頓大可以party mode，而曼聯則作客阿士東維拉則會直接影響到維拉來季歐戰走邊條路，但呢一刻嘅曼聯能否出全力俾到壓力維拉已成疑問。咁啱曼、熱兩隊不久後都會到訪香港，曼聯喺下星期5月30日於香港大球場迎戰香港足球代表隊，根夏就算一如所料加盟亦只係新球季嘅事，今趟只能緣慳一面。而熱刺則會喺7月31日於啟德主場館與阿仙奴進行海外版嘅北倫敦的打吡，屆時已踏入2025/26新球季，大家又可以留意吓到時嘅熱刺會見到乜嘢新臉孔。（歐霸盃X圖片）