弗賴堡歷來首次踏足歐洲賽事決賽，對全隊上下都係個夢寐以求嘅大日子。阿士東維拉則係相隔44年，先至再次出現喺歐洲盃賽決賽，上一次已經要追溯番去1982年嘅歐冠盃，而有趣嘅係，維拉當年又係面對德甲代表、喺鹿特丹以1:0贏咗拜仁慕尼黑。今次嚟到布達佩斯再遇德甲代表，維拉俾外界一致看好。弗賴堡不嬲識穩守突擊，加上日本新援受傷缺席，話唔定已準備好要頂到加時。

大家成日笑歐霸盃係「西維爾盃」，但亦都唔好計漏維拉主帥艾馬利，今次已經係佢第六次以主教練身份殺入歐霸盃決賽：2014年至2016年佢連贏三次呢個「西維爾盃」不在話下，原來2021年佢帶維拉利爾都再贏多次，前五次之中就只有帶阿仙奴嗰屆輸俾車路士（2019）。

維拉今季英超開局好快爬升到第三位，但聯賽、足總盃、歐霸盃三線夾擊之下進入三月出現疲態，英超排名一跌再跌，好在歐霸四強兩回合關鍵戰只需要留喺英國同諾定咸森林對賽，維拉亦都把握熟悉老對手嘅優勢合計以4:1晉身決賽，再喺上週末主場贏利物浦，提前一週確定來季有得重返歐聯。維拉首席射手奧利屈堅斯（Ollie Watkins）今季表現跌watt，好在下半季稍為收復失地，其間靠攻中摩根羅渣士（Morgan Rogers）撐住之餘，亦好在從利華古遜回收番嘅攻中布安迪亞（Emiliano Buendia）及時「填數」。當然，中場樞紐泰利文斯（Youri Tielemans）、阿馬度奧拿拿（Amadou Onana）以至隊長麥堅（John McGinn）都保持高效輸出。較為可惜係阿馬度奧拿拿自五月起再受傷患困擾，今場未必可以上陣。

長期俾人當係鄉下球會嘅弗賴堡呢幾年搬入現代化新球場、「老員工」史迪治再將帥位交託俾得意弟子祖利安蘇斯達，殺入歐洲賽決賽正係球會想發圍嘅其中一個目標。不過弗賴堡陣容一直較為「清減」，今季任由日本隊隊長堂安律出走幾乎闖出禍，但弗賴堡並未放棄盃賽，好多時為咗晉級而影響聯賽表現亦在所不惜，其中德國盃亦要打到去四強先至讓路俾史特加。與此同時，佢哋又已經成功留力、大勝完切爾達再險勝布拉加，一償所願殺入歐霸決賽。

今季新加盟、試圖「以一換一」頂替堂安律嘅日本攻擊球員鈴木唯人本來值得向大家推介留意，但好不幸仍剛剛喺比賽中鎖骨受傷已經收咧，對於弗賴堡進攻嚟講都幾致命，事關餘下嘅兩位進攻主力基利科（Vincenzo Grifo，33歲，全季入15球）與及馬坦奴域（Igor Matanovic，22歲，全季入14球）全季正賽合共攻入30球都唔夠，中場主力艾格斯坦（Maximilian Eggestein）與及今季彈起嘅文森比（Johan Manzambi）壓力唔細。正面啲諗基利科嘅盃賽平均統計數字會靚過聯賽（歐霸14場5入球4助攻），上週六聯賽煞科亦好在係遇著早已鎖定歐聯席位嘅RB萊比錫，基利科只需要臨尾踢30分鐘，得以保持狀態應付今場決賽。此外呢場決賽估計弗賴堡將要長時間硬接維拉嘅進攻，一對擁有豐富國際賽經驗嘅中堅堅達（Matthias Ginter）、連赫特（Philipp Lienhart），以至新冒起嘅23歲門將艾圖布魯（Noah Atubolu）嘅臨場發揮都好有決定性作用。

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。