22/12/2025 阿士東維拉 vs 曼聯

足球資訊 | 英格蘭超級足球聯賽(2025/26) | 發布日期: 20/12/2025

比賽日期	主隊	客隊	主勝機率	和局機率	客勝機率
2025-12-22 00:30	阿士東維拉	曼聯	58.4 %	21.8 %	19.8 %

主勝機率	和局機率	客勝機率
58.4%	21.8%	19.8%

排名: 英超(3) vs 英超(6)

直播資訊: Now 611/621, NowE

阿士東維拉已係英超、歐霸夾埋九連勝，喺兩大賽事中嘅排名都係第三，英超呢邊冇耐之前亦已喺主場擊退榜首阿仙奴，贏咗呢場關鍵嘅「六分波」之後現時就只係落後對方三分，英國傳媒都開始討論呢隊維拉問鼎英超冠軍嘅可能性。維拉今個週日尾場主場迎戰排名從谷底回升嘅曼聯，已經冇人會懷疑佢哋有爭取十連勝嘅野心。

根據過去五季嘅統計，曼聯累積傷患次數冠絕全英超。今季雖然情況稍有改善，但就輪到非洲國家盃開鑼，令曼聯一次過失去兩位進攻主力：麥比奧莫（英超入球：6）與及迪亞路，而後衛馬斯拉奧就更已係上星期提早離隊去摩洛哥大營報到。相比之下，維拉計勻全隊都只係得後備前鋒基桑抽走咗（今季英超暫未有入球），實際影響可謂微乎其微。

咁不過，教練艾馬利都承認隊波底子冇人咁厚，一直係靠高昂嘅士氣撐住今輪英超快車，而傷患始終係佢哋嘅最大敵人。維拉兩位中堅柏奧托利斯、明斯較大機會去到2026年先有得再見，而正選門將達米安馬天尼斯（Emiliano Martinez）則喺錯過上場對韋斯咸嘅聯賽之後大有機會喺今場傷癒復出，有望加強防守穩定性。

今季英超中游爭持激烈，只要稍有差池排名就可以一下子嚟個大兜亂，今週開賽前第五至第八名更係同得26分，其中曼聯就自十一月起只踢出兩勝四和一負卻反覆守住第六嘅位置。上場對般尼茅夫踢成4:4嘅大手筆交易，賽前就已盛傳艾摩廉呢位「3-4-3死硬派教練」已開始秘密操練四後衛陣式。艾摩廉賽後就強調陣式呢樣嘢可以靈活調整，雖然場波表面上曼聯係維持番三中堅，但實際過程中已多次隱約見到四後衛打法嘅影子，例如今季多放喺中場邊路嘅達洛治（Diogo Dalot）就不時墮後充當左閘。咁但係當麥比奧莫同埋迪亞路將要暫別，呢套未完全熟練嘅新打法又有冇得維持落去？近四場淪為後備嘅邊路球員多古（Patrick Dorgu）或會重新發揮作用之餘，今場巴西防中卡斯美路儲夠黃牌停賽都可能成為影響賽情發展嘅關鍵。

分類:

足球資訊

22/12/2025 阿士東維拉 vs 曼聯

分類:

標籤:

關於我們:

快速連結:

聯絡我們: