英超精選賽前分析(21/02/2026-24/02/2026)

足球資訊 | 英格蘭超級足球聯賽(2025/26) | 發布日期: 20/02/2026

直播資訊: Now TV, NowE

21/02/2026 23:00 阿士東維拉(英超3) vs 列斯聯(英超15)

主勝: 61.2% 客勝: 17.8%

主力多傷嘅維拉近期只能取得約一半嘅分數，後面曼聯、車仔已慢慢追貼壓力漸大。列斯聯下一場對手係已全面回勇嘅曼城，或會較想喺今場搏咗先。

21/02/2026 23:00 賓福特(英超7) vs 白禮頓(英超14)

主勝: 41.8% 客勝: 31.7%

兩隊同樣喺足總盃輪換出戰，白禮頓咁樣輸俾利物浦出局本來無可厚非，但正賽已累積連續六場不勝令球迷不滿加深。踏入二月接連喺維拉、阿仙奴身上取得四分嘅賓福特只係好彩少少僅贏一球晉級，今場有主場之但亦有翼鋒Schade停賽。

21/02/2026 23:00 車路士(英超5) vs 般尼(英超19)

主勝: 66.5% 客勝: 14.6%

般尼喺足總盃輪換致敗已係無話可說，要留意嘅係車仔聯賽最近六場取得五勝一和睇嚟已適應到新帥打法，前鋒Joao Pedro更係狀態火熱，過去五場聯賽貢獻四球+四助攻。

22/02/2026 01:30 韋斯咸(英超18) vs 般尼茅夫(英超9)

主勝: 36.8% 客勝: 41.2%

般尼茅夫近六場英超四勝二和，排名已從第十五爬升至第九。韋斯咸兩輪足總盃輪換之下都係靠打到加時晉級，期間聯賽則交出三勝一和一負嘅佳績，上場英超打斷曼聯嘅五連勝美夢亦令隊中多番啲喜感。

22/02/2026 04:00 曼城(英超2) vs 紐卡素(英超10)

主勝: 71.1% 客勝: 11.4%

曼城近七場正賽六勝一和，主場出擊已佔盡上風，唯獨要留意紐卡素最近試新陣，入球停產嘅Woltemade移後將正中鋒位讓俾翼鋒底嘅Gordon，後者多有斬獲之餘更剛喺歐聯附加賽獨取卡拉巴克四球。

22/02/2026 22:00 水晶宮(英超13) vs 狼隊(英超20)

主勝: 44.2% 客勝: 25.4%

狼隊星期三追平阿仙奴，收獲重要嘅士氣分，水晶宮則係頹勢未消，英超九場不勝走勢只係中斷咗一場咁大把，上週隨即已不敵般尼，而呢十場不勝嘅聯賽之中就只有一場係不失球。

22/02/2026 22:00 諾定咸森林(英超17) vs 利物浦(英超6)

主勝: 19.0% 客勝: 52.3%

森林今場迎嚟今季第四位教練Pereira嘅英超首戰，佢星期四歐霸附加賽入鄉隨俗保留咗上手嘅4-2-3-1陣式作客費倫巴治贏3:0，球員睇嚟好快上手踢法比之前更有組織。利物浦上週六足總盃第四圈1:0小勝白禮頓晉級，今場有傳Frimpong有機復出，若果成事將有望加強邊路推進。

22/02/2026 22:00 新特蘭(英超11) vs 富咸(英超12)

兩隊同時於足總盃第四圈晉級，富咸喺兩round之間嘅五場聯賽之中只能靠恰近況更頹嘅白禮頓袋到三分，作客則更係近四場只執一分，以呢種近況嚟到光明球場可謂十分凶險。主隊新特蘭暫時失去隊長Xhaka兼喺上場俾利物浦破身，今場只會更為激發喺主場重拾霸氣嘅決心。

24/02/2026 04:00 愛華頓(英超8) vs 曼聯(英超4)

主勝: 31.2% 客勝: 44.1%

曼聯五連勝美夢斷喺韋斯咸手中，但整體狀態仍處於高位，教練卡域克帶隊五場平均只失一球。愛華頓雖然主場出動但冇乜優勢可言，聖誕至今五場主場竟係兩和三負冇贏過，今場更要煩惱搵邊個頂替停賽嘅右閘O'Brien。