23/02/2026 熱刺 vs 阿仙奴

足球資訊 | 英格蘭超級足球聯賽(2025/26) | 發布日期: 21/02/2026

比賽日期	主隊	客隊	主勝機率	和局機率	客勝機率
2026-02-23 00:30	熱刺	阿仙奴	19.9 %	21.2 %	58.9 %

主勝機率	和局機率	客勝機率
19.9%	21.2%	58.9%

排名: 英超(16) vs 英超(1)

英超最受矚目嘅打吡戰，兩隊未開波已經成為新聞焦點。阿仙奴爭冠之路，有如季度連續劇嘅劇本，又再一次被後勁凌厲嘅曼城逼到埋身。左右夾擊嘅仲有熱刺，要阻止同市宿敵登上英超寶座，但而家亦自身難保，距離降班區只有5分。熱刺大戰前嘅大地震，終於震走領隊法蘭，換上一位喺歐洲球壇有豐富經驗嘅消防員，希望盡快將球隊從水深火熱，降班危機中救出。榜下游嘅熱刺要搶分，榜首嘅阿仙奴亦不能再有失。聯賽近七場21分只係攞到10分，現踢多一場只領先曼城5分，呢場有乜閃失，阿仙奴嘅榜首優勢，就隨時兩個星期內由9分縮窄到2分。

嚟到下半季，英超再有熟悉嘅情節出現，阿仙奴雖然未受傷兵困擾板凳亦夠深，但近期不斷失分。周中補賽對狼隊，喺領先兩球下俾人迅速扳平，大衞拉耶(David Raya)同加比爾(Gabriel Magalhães)嘅溝通出錯導致補時階段跌咗2分，賽後球員都一臉茫然。防守上阿仙奴冇再好似上半季咁銅牆鐵壁，今季阿仙奴英超失咗20球，有7球係由預計入球值細過0.05之下失嘅。對狼隊下半場退守而受壓，比賽尾段球員心情緊張，縱使阿迪達不斷提場示意球員要淡定同保持控球，最後仍犯錯失波。自2026起，只有水晶宮同韋斯咸(8)係領先下失分比阿仙奴(7)多。無論係犯錯或者精神唔集中，都再次顯示球員抗壓力不足，未具備爭冠球隊嘅心理質素。

英超球隊要護級，大家會諗起大Sam艾蘭戴斯。樸斯迪哥高奧喺訪問中提到熱刺唔係大球會，但作為傳統Big 6之一，熱刺要搵看守領隊，目標當然更遠大，所以揀咗曾救過唔少歐洲大球會嘅杜陀(Igor Tudor)。佢之所以被稱為救火專家，源於多次喺球隊陷入危機時臨危受命，並能夠即時帶黎效果。佢曾於過去兩季短期接手祖雲達斯同拉素，成功帶領球隊奪得歐洲賽一席。杜陀主張前場高強度，同時著重防守，先穩後攻嘅踢法，確實適合短期止血。佢偏好用3-4-2-1 陣式，由於羅美路(Cristian Romero)仍然停賽，杜陀有機會以祖奧柏連拿(João Palhinha)，達古辛(Radu Drăgușin)搭雲迪芬(Micky van de Ven)鎮守後防。前鋒線上高路姆亞尼(Randal Kolo Muani)上季喺祖雲達斯杜陀帶領下有好表現，如果杜陀有說明書，高路姆亞尼有機會成球隊嘅重要一員。

星期日呢3分對兩隊同樣重要，失分將會失埋勢，一隊跌落降班漩渦，另一隊嘅爭標之路更崎嶇。熱刺新領隊可能令球隊士氣提升，但傷停太多，只有十三個一隊球員參與操練，實力上大打折扣，面對決心搶分嘅兵工廠，杜陀首場嘅任務甚為艱巨。

分類:

足球資訊

23/02/2026 熱刺 vs 阿仙奴

分類:

標籤:

關於我們:

快速連結:

聯絡我們: