利物浦對阿仙奴，近幾季都係爭冠之戰，兩隊係英超暫時全勝嘅三隊其中兩隊，雖然剛開季，呢場6分波隨時影響季尾戰局。兩隊由季前已經不斷增兵準備開火，英超幾大球會都明白要爭冠，火力猛嘅武器不能少，所以夏季轉會窗中鋒就特別渴市，利物浦同阿仙奴各簽咗一個，而新兵亦以入球展示球隊超強攻力。利物浦首兩場賽事入7球，阿仙奴亦有6球進帳，入球數字已經顯示兩隊實力接近。利物浦近六場聯賽對阿仙奴和四場輸兩場，近三場喺晏飛路全部和局收場，每次對戰都鬥到難分難解。

 

利物浦上星期一喺聖占士公園上演咗場火藥味濃嘅大戰，紐卡素球員球迷為咗移情利記而求去嘅伊薩(Alexander Isak)，將場內氣氛推到沸點，加上紐卡素體力化踢法，熱血搏盡之下一個領紅三個受傷。利物浦喺打多一個嘅情況下被對手追和，最後憑16歲左翼新星安古姆夏(Rio Ngumoha)補時絕殺成3:2。上季擅長控制比賽節奏嘅利物浦，今季攻守失衡，連續兩場都失兩球。合約去到最後一年嘅干拿迪(Ibrahima Konaté)踢到失失慌，轉會窗仲有幾日就關上，利物浦雖然簽咗意大利年輕中堅利奧尼(Giovanni Leoni)，仍需要個有經驗嘅球員鞏固同重建後防，據報道水晶宮嘅古希(Marc Guéhi)仍有機會轉投。

 

阿仙奴首兩場聯賽1:0贏曼聯，5:0擊敗列斯，攻力同利物浦不相伯仲，但防守上滴水不漏一球不失就穩健得多。貴為上兩季歐洲五大聯賽角球之王，佢哋喺聯賽兩季共入咗33個角球。對曼聯禁區內成功阻擋對手，由卡拉科利(Riccardo Calafiori)頂入奠定勝局，對列斯就有添巴(Jurriën Timber)接應迪勤懷斯(Declan Rice)開出角球梅開二度。上季阿仙奴尾段欠缺埋齋嘅射手，經常未能憑入球全取三分，今季有射手基奧基尼斯(Viktor Gyökeres)加盟，佢上場大顯射手本色，自己控球殺入禁區勁射破網。

 

雖然上場大勝，阿仙奴損兵折將，沙卡(Bukayo Saka)同奧迪哥特(Martin Ødegaard)傷出，就算奧迪哥特未能趕及復出，兵工廠仍有最新兵器艾斯(Eberechi Eze)隨時候命。阿仙奴嘅死球強茅，會對利物浦嘅防守死球弱盾，主場球迷作為球隊第十二人會係勝負關鍵。