雙曼今夏跟英超群雄一樣補強，聯賽踢到第三輪成績都不似預期。唔少人睇好今季會復甦嘅曼城連輸兩場，創下球隊自2004/05後開季三場輸兩場嘅紀錄，處於聯賽榜下半版，排名仲要低過同市宿敵。曼聯叫排高幾位，上場亦只係驚濤駭浪之下先喺般尼身上全取三分。國際賽期後重新出發，一場勝仗對雙方都極為重要。

 

哥迪奧拿曾經批評世冠盃令球員冇足夠時間休息就開季，結果就真係出現季初傷患潮。上場聯賽已經失去大腿受傷需要休息兩個月嘅嘅卓基(Rayan Cherki) 。馬莫殊(Omar Marmoush)代表埃及時膝蓋韌帶受傷，史東施(John Stones)亦因傷退出英格蘭國家隊。曼城雖然聯賽首場大勝狼隊，之後輸比熱刺同白禮頓。對白禮頓上半場佔盡進上風，下半場無以為繼倒輸，上季頹風仍未洗走。中前場傷兵唔少，好彩主力夏蘭特(Erling Haaland)狀態大勇，對摩爾多瓦轟入5球協助挪威狂數對手11:1，喺龍門執個波出嚟都執到唔好意思，要向對手門將耍冧。至於剛由PSG加盟嘅鋼門當拿隆馬(Gianluigi Donnarumma)有機會處子登場，腳下功夫雖然不及艾達臣(Ederson)，哥迪奧拿就欣賞佢嘅身型同大戰經驗。

 

曼聯季初最搶鏡嘅係兩位邊路新兵，根夏(Matheus Cunha)同麥比奧莫(Bryan Mbeumo)激活鋒線，而中場曼治(Mason Mount)嘅傳送同遠射亦回復車路士奪歐聯冠軍時嘅水準。曼聯三場聯賽總共58次射門，比其他英超球隊多14次，加上般奴費蘭迪斯(Bruno Fernandes)呢個今季製造最多入球機會(12)嘅球員，令曼聯xG值成為英超之冠。不過xG只係一個參考數字，對阿仙奴同般尼曼聯攻勢唔少但未算銳利，加上中鋒錫施高(Benjamin Sesko)暫時得個坐字，曼聯只係入咗4球。當拿隆馬揀咗曼城，曼聯亦喺轉會窗關上前簽咗比甲第4傳球成功次數最多嘅門將，被稱為古圖奧斯接班人嘅拿文斯(Sanne Lemmens)，艾摩廉就會俾佢時間適應，打吡仍然會由拜因迪亞（Altay Bayındır)把關。

 

曼聯近幾季對強隊表現愈強越強，哥迪奧拿喺主場敗仗有四份一(4/16)係失手於紅魔身上。呢場曼聯最大嘅隱憂係主力根夏同復甦嘅萬治養傷，而防守今季仍然未有改善。曼城雖然傷兵滿營，仍有足夠實力喺主場全取三分。

 

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。