28/12/2025 車路士 vs 阿士東維拉

足球資訊 | 英格蘭超級足球聯賽(2025/26) | 發布日期: 25/12/2025

比賽日期	主隊	客隊	主勝機率	和局機率	客勝機率
2025-12-28 01:30	車路士	阿士東維拉	51.5 %	23.2 %	25.2 %

主勝機率	和局機率	客勝機率
51.5%	23.2%	25.2%

排名: 英超(4) vs 英超(3)

直播資訊: Now 611/621, NowE

經過各項賽事10連勝，維拉升上聯賽榜第三位，距離榜首阿仙奴三分，士氣高昂。排第四嘅車路士誓要喺史丹福橋當勝利終結者，雖然上季同一場車路士大勝3:0，最近三次主場對碰輸兩場。維拉如果呢場贏，11連勝就會同1914年嘅球會紀錄睇齊。

史丹福橋一向係車路士嘅堡壘，但近年未算穩定。今季八場只係贏咗四場，表現起伏，聯賽近五場只係贏咗一場，攻力疲弱，入波最多嘅係各入五球嘅柏度尼圖(Pedro Neto)同祖奧柏度(João Pedro)，英超平均每三場先有入球或助攻。本週中鋒戴納(Liam Delap)膊頭傷患終於痊癒，加上18歲嘅右翼新星艾斯迪華奧(Estêvão)復出，可以喺邊線利用速度，靈活走位同突破能力，拉開對手嘅防線。再有近期復出，對愛華頓入波嘅彭馬(Cole Palmer)，馬列斯卡賽前表示，佢嘅體力已經足夠應付九十分鐘，只要佢搵返比賽節奏，車路土嘅攻力將得以釋放。

阿士東維拉近況甚佳，要多謝摩根羅渣士 (Morgan Rogers)嘅冒升。季初被批評狀態低迷，而家大爆發，上場對曼聯梅開二度，成為上週英超最佳球員，帶領維拉取得聯賽7連勝，連領隊艾瑪利都激動到除褸掟走慶祝。由上個國際賽期起，只有羅渣士嘅進攻數據好過夏蘭特(Erling Haaland)。今季英超17場攻入7球3助攻，入球貢獻係英超英格蘭球員中最多，難怪深得杜曹歡心。

摩根羅渣士同對手彭馬一樣，招牌入波慶祝方式都係雙手交叉放胸前，兩位離開曼城就脫胎換骨，球隊攻擊核心「10號位」將同場較量。彭馬代表藍軍嘅控球同創造力，而羅渣士則是維拉嘅攻擊引擎。呢場對決，將主宰球隊嘅命運。

車路士近期成績雖然唔算突出，但主場防守唔錯，近三場不敗而且只失一球。今季三次對賽當時聯賽榜排名比佢哋高嘅球隊都不敗(贏利物浦，熱刺，和阿仙奴）對實力較弱嘅球隊反而成績欠佳，主場球隊仍睇高一線。

分類:

足球資訊

28/12/2025 車路士 vs 阿士東維拉

分類:

標籤:

關於我們:

快速連結:

聯絡我們: