英超精選賽前分析(02/05/2026-05/05/2026)

足球資訊 | 英格蘭超級足球聯賽(2025/26) | 發布日期: 30/04/2026

直播資訊: Now TV, NowE

02/05/2026 03:00 列斯聯(英超15) vs 般尼(英超19)

主勝: 46.1% 客勝: 27.3%

列斯聯目前排名第15，近五場二勝三和狀態相對穩定，而上星期日足總盃亦見番防中Stach嘅身影。般尼降班之後已俾教練Parker提前走人，Mike Jackson出任看守教練，各種消息都指向今仗陣容會有較大變動。

02/05/2026 22:00 賓福特(英超9) vs 韋斯咸(英超17)

主勝: 47.7% 客勝: 27.0%

呢一刻護級焦點已較為集中喺韋斯咸與熱刺之爭。主隊賓福特贏般尼後連和五場最終敗喺作客曼聯，而五場和局之中就有三場係0:0，反映攻力不足。韋斯咸目前排第17，僅高出降班區兩分，上仗主場2:1贏愛華頓，近三場二勝一和但需留意對手都係下半版嘅球隊。

02/05/2026 22:00 紐卡素(英超14) vs 白禮頓(英超6)

主勝: 38.6% 客勝: 41.5%

紐卡素繼續潛水，不經不覺又連輸咗四場，右閘Livramento上場對阿仙奴傷出確定缺陣，左翼Gordon則仍有待觀察。白禮頓急起直追歐聯席位，上一輪更係把握車仔內亂嘅最後時機拎晒三分擊敗狼隊，自足總盃出局以嚟八場英超贏咗六場。

02/05/2026 22:00 狼隊(英超20) vs 新特蘭(英超12)

主勝: 39.7% 客勝: 32.1%

新特蘭數字上仍未上岸，但持續放飛自我，上週主場都要俾另一護級份子森林大炒五球，近五場都只係贏到近況奇差嘅紐卡素與及熱刺。已降班嘅狼隊上週僅負熱刺一球，唔想等到收爐戰對般尼先爭取再贏一仗嘅話，今場將會係最佳嘅搏搥機會。

03/05/2026 00:30 阿仙奴(英超1) vs 富咸(英超10)

主勝: 61.8% 客勝: 14.5%

阿仙奴依家嘅三分優勢只因係多踢曼城一場，上場小勝內部不穩嘅紐卡素一球，前鋒Havertz及入球者Eze及後更要因傷退下火線，成場波xG低見0.64，嚟緊嘅爭標壓力只會有增無減。及後星期三歐聯四強亦僅係作客賽和馬體會，Eze有落場而Havertz未見蹤影。

03/05/2026 21:00 般尼茅夫(英超7) vs 水晶宮(英超13)

主勝: 32.7% 客勝: 37.6%

般尼茅夫則係一月至今14場不敗，雖則係和多過贏（六勝八和）。奇就奇在客勝多過主勝。水晶宮聯賽、歐協聯兩邊同樣出力效果唔係咁討好，上週冇乜輪換之下客場輸利物浦1:3，星期四又要作客波蘭中立場full team對薩克達踢歐協聯四強，本來希望呢場傷癒復出嘅翼鋒Guessand最終都係冇列入大軍名單。

03/05/2026 22:30 曼聯(英超3) vs 利物浦(英超4)

04/05/2026 02:00 阿士東維拉(英超5) vs 熱刺(英超18)

主勝: 34.2% 客勝: 42.8%

熱刺取得踏入2026年首場英超勝仗，但換個角度睇就對住狼隊都要踢到雞手鴨腳，而重啟後稍見起色嘅Xavi Simons更遇上重傷估計已經告別2026年所有賽事，及後就連Solanke都話傷勢重到大有機會同樣收咧，嚟緊熱刺前鋒球員已差唔多係只要冇傷就已經要放晒落場。維拉則係作客富咸輸波再跌一名，將個第四相讓咗俾利物浦，星期四full team作客森林踢歐霸四強僅負一球十二碼。

04/05/2026 22:00 車路士(英超8) vs 諾定咸森林(英超16)

主勝: 49.7% 客勝: 28.0%

車仔上週初聯賽輸夠白禮頓三粒，球員玩嘢為求換帥終於得手，看守教練專達人McFarlane重出江湖，星期日足總盃四強小勝列斯聯只算係剛剛起步。森林發惡大炒新特蘭5:0，護級形勢稍見曙光，星期四歐霸主場接近出全力只能憑罰球領先維拉一球。

05/05/2026 03:00 愛華頓(英超11) vs 曼城(英超2)

主勝: 14.9% 客勝: 59.1%

愛華頓上週俾韋斯咸上演絕殺，只怪自己爭打歐賽嘅決上及不上對家求勝護級嘅決心。曼城上週踢兩賽都冇見到中場Rodri，而星期六足總盃四強對修咸頓則要靠一班正選入替先可以奠勝。

分類:

足球資訊

英超精選賽前分析(02/05/2026-05/05/2026)

分類:

標籤:

關於我們:

快速連結:

聯絡我們: