國際賽假期期間，英超最大單新聞莫過於諾定咸森林終於要炒教練紐奴。紐奴同球主嘅牙齒印遠比上場輸韋斯咸三粒嚟得關鍵，而紐奴本身係帶領森林闖入歐霸嘅重要功臣，如今「因私怨」落鑊，更衣室氣氛將會係新帥普斯迪高古（圖左）其中一個首要處理嘅事項。上場輸波後紐奴仍表示大軍喺龍門、閘位仍需要加強，及後森林再一次搵保地花高，引入門將約翰域陀（John Victor），又問阿仙奴借來左閘辛真高（Zinchenko），嚟緊就要睇同樣踢開4-2-3-1嘅普斯迪高古覺唔覺得係啱用。

阿仙奴目前較大問題仍在於傷患陰影，繼前鋒夏維斯、布卡約沙卡（Bukayo Saka）、加比爾捷西斯先後傷晒，就連後衛沙列巴亦喺上場對利物浦嘅比賽期間傷出，阿記喺前線少咗創造力之餘後防線實力亦告即時受損，無疑係埋下作客輸波嘅伏線。喜訊係沙卡已開始恢復訓練，目標就係今場要復出鬥森林，加上阿仙奴過去喺英超主場對森林嘅成績相當亮眼，森林重返英超以嚟作客酋長球場成績更係慘不忍睹嘅三場全輸、得失球1:10，帶領熱刺從未贏過「廠隊」嘅普斯迪高古今場新官上任睇嚟只宜謹慎行事。（英超官網圖片）

^*比賽預測服務完全由A.D.A. Analytica提供,所載資料只供參考。A.D.A. Analytica將不對任何人士因使用比賽預測所蒙受的任何損失或損害負上責任亦不會作出任何賠償。