16/08/2025 利物浦 vs 般尼茅夫

足球資訊 | 英格蘭超級足球聯賽(2025/26) | 發布日期: 14/08/2025

英超揭幕戰，上季冠軍利物浦主場迎戰般尼茅夫。兩隊今個夏季大換班，利物浦奪冠後大灑金錢增強實力，處於轉會市場食物鏈下層嘅般尼茅夫上季踢得對板即被人拆骨。The Atheletic「球迷期望指數」調查發現，對來季表示樂觀嘅利物浦迷佔97%，僅次於車路士排第二，般尼茅夫排名尾五，球迷樂觀指數只係48%。般尼茅夫上季表現唔錯，球員有大球會問津亦證明球隊嘅實力，只係後防線重整之後嘅季前熱身賽表現一般，想開季開得好，但聯賽首場就要激戰利物浦。

利物浦今夏紐尼斯(Darwin Núñez)，路易斯迪亞斯(Luis Díaz)相繼離隊，加上祖達(Diogo Jota)不幸離世，攻擊力深厚嘅板櫈，只剩史諾唔多用嘅基艾沙(Federico Chiesa)。非「利」不嫁紐卡素嘅伊薩(Alexander Isak)仍前途未卜，好彩伊基迪基(Hugo Ekitiké)一插即用，瞬即融入新任德國足球先生穫斯(Florian Wirtz)同沙拿(Mohamed Salah)嘅進攻體系。佢身材高大但走位靈活，喺季前賽同社區盾都展示出個人突破能力，又能夠喺禁區內同隊友短傳炮製入球。利物浦季前賽先後以3:1，5:0擊敗普雷斯頓同史篤城，3:1戰勝橫濱水手，4:1和3:2贏畢爾包。不過對AC米蘭2:4嘅敗仗就暴露咗後防嘅問題，例如防守死球，對手快速反擊時兩閘未能及時回防。社區盾對水晶宮時，聯賽首場對般茅夫停賽嘅格雲貝治(Ryan Gravenberch)缺陣，中場被對手控制節奏。史諾當然亦睇到球隊嘅不足，據報道已確定引入帕爾馬嘅18歲中堅新星祖雲尼利奧尼Giovanni Leoni)。

般尼茅夫上季排名第九，雖然爭唔到歐洲賽一席，個別球員嘅亮眼表現，成為歐洲各大球會嘅目標。今季後防失去卡卡斯(Milos Kerkez)，侯辛(Dean Huijsen)，沙班尼(Illia Zabaryni)，季前賽防守表現脆弱，贏愛華頓3:0後0:2不敵韋斯咸，1:4不敵曼聯，只能賽和皇家蘇斯達0:0同1:1。儘管如此，般尼茅夫嘅攻擊力亦不容忽視，約斯天古華特(Justin Kluivert)季前熱身賽受傷，預計呢場未能趕及上陣，攻堅仍然會由伊雲尼遜(Evanilson)同施曼尤(Antoine Semenyo)負責。般若尼茅夫體力化嘅高位逼搶同快速反擊依然具威脅，食正利物浦季前賽嘅弱點。

般尼茅夫從未喺晏飛路贏過波，近十二場對賽輸咗十一場。面對主隊利物浦嘅強勁攻擊力，加上自身防守不穩，要睇入球嘅球迷，呢場應該唔會令你哋失望。

分類:

足球資訊

16/08/2025 利物浦 vs 般尼茅夫

分類:

標籤:

關於我們:

快速連結:

聯絡我們: