25/01/2026 水晶宮 vs 車路士

足球資訊 | 英格蘭超級足球聯賽(2025/26) | 發布日期: 23/01/2026

比賽日期	主隊	客隊	主勝機率	和局機率	客勝機率
2026-01-25 22:00	水晶宮	車路士	24.1 %	29.5 %	46.4 %

主勝機率	和局機率	客勝機率
24.1%	29.5%	46.4%

排名: 英超(13) vs 英超(6)

直播資訊:

上星期英超第22週，水晶宮作客同樣係唔多夠腳嘅新特蘭輸1:2，主帥加士拿賽後又嚟大暴走，大爆佢都係賽前先知道前隊長馬克古希轉會曼城。古希同加士拿一樣，本來都係預咗完季點都會走人，如今水晶宮開季先賣艾斯去阿仙奴，冬窗就輪到古希提前跳船，加士拿手揸呢副爛牌，正賽已係十場不勝（單計英超二和五負），當眾暴走一度令人以為佢又想學艾摩廉搏曼聯炒人。

不過今次結局睇嚟會有所不同，球會管理層決定同呢位上屆贏盃功臣唔掂傾到掂，點都希望好來好去完成埋餘下半季，此外亦都促成從熱刺引進上半季失勢嘅翼鋒班倫莊臣（Brennan Johnson），只不過莊臣嚟到之後暫時要踢靠番中間嘅位置，三場只係收獲兩張黃牌暫未有咩建樹。反而另一邊廂輪到今季英超入咗八球嘅中鋒馬迪達（Jean-Philippe Mateta）正式表達離隊意願，原因亦講到明係球會嘅擴軍力度貨不對辦，而佢亦都更加想踢歐聯，唔會滿足於家陣打歐協聯都要參加十六強附加賽嘅境地。水晶宮如今再有馬迪達嗌走人，更衣室氣氛勢將再跌至更低點，靠就靠加士拿嘅臨場調度同埋感染力。

至於水晶宮今場對手車路士，就已經歷過突發換帥嘅震痛。羅仙尼亞從「車仔二隊」斯特拉斯堡「抽調」過嚟，球隊亦處於重新調整同埋重振士氣嘅階段之中，就以星期三歐聯主場都只能小勝帕福斯1:0為例，過程亦係稍欠說服力，可見「藍戰士」面對牌面較弱對手就算想適量輪換，都未必可以輕言必勝。

但就喺呢個時候，傳出首席攻中、出自曼城青訓嘅彭馬（Cole Palmer）唔習慣倫敦嘅生活，有意「番鄉下」加入曼聯。雖則早前都傳過車仔只要價錢合胃口都可以出售彭馬，但會唔會就此轉讓俾英超直接競爭對手呢？呢單傳聞仍未講得好實，但話晒喺隊內競爭咁激烈嘅車仔短短兩年半就可以踢過百場、射入48球兼有29個助攻，一個健康嘅彭馬對於呢支仍未平復嘅車路士嚟講仍係十分重要。星期三歐聯場波彭馬因輕傷避戰，今場作客水晶宮則要靠佢復出繼續搏殺。

呢一刻車路士以34分位處聯賽榜第六位，只比曼聯少一分，但與此同時緊隨其後嘅賓福特、紐卡素、新特蘭亦都只係比車仔少一分，就連第十位嘅愛華頓數字上都有爬頭嘅可能，車路士對於呢刻嘅位置一定唔滿意，與此同時英超同水晶宮對賽亦已累積16場不敗紀錄（雖則最近期係連和三場），今場理應係爭取分數嘅好機會，不過亦都需要留意下星期三車仔就要作客拿玻里踢埋歐聯聯賽階段嘅最後一場賽事，車仔自己位於直接出線邊緣嘅第八，而拿玻里則係附加賽名額以外嘅第25位，雙方仍有需要硬拼嘅理由，然則車路士今場話唔埋仍係會有所顧慮。

分類:

足球資訊

25/01/2026 水晶宮 vs 車路士

分類:

標籤:

關於我們:

快速連結:

聯絡我們: